26.04.2026 | 21:21
Իրավիճակը Մալիում․ մահացել է պաշտպանության նախարարը, երկրում թեժ մարտեր են
Ադրբեջանը պետք է դադարեցնի լրագրողների և ակտիվիստների ահաբեկումներն ու նրանց նկատմամբ ոտնձգությունները․ Դունյա Միյատովիչ
Քաղաքականություն
26.03.2024 | 17:08
Ադրբեջանում լրագրողների և քաղաքացիական հասարակության անդամների նկատմամբ աճող բռնաճնշումները խորը մտահոգության պատճառ են։ Այս մասին ասվում է Եվրոպայի խորհրդի մարդու իրավունքների հանձնակատար Դունյա Միյատովիչի հայտարարության մեջ։
«Վերջին ամիսներին Ադրբեջանի իշխանություններն ուժեղացրել են ճնշումները անկախ ԶԼՄ-ների, քաղաքացիական հասարակության և ակտիվիստների նկատմամբ, որոնք լեգիտիմորեն իրականացնում են իրենց աշխատանքը կամ դրսևորում այլ կարծիք ու քննադատական տեսակետ կառավարության նկատմամբ: 2023 թվականի նոյեմբերին առնվազն վեց լրագրող կալանավորվել է կասկածելի մեղադրանքներով, այդ թվում՝ Abzas Media-ի տնօրեն Ուլվի Հասանլին և դրա գլխավոր խմբագիր Սևինջ Վագիֆքիզին, Kanal 13-ի հիմնադիր Ազիզ Օրուջովը և դրա հաղորդավար Ռուֆաթ Մուրադլին, ինչպես նաև անկախ լրագրող Թեյմուր Քարիմովը։ Մի քանի այլ լրագրողներ հարցաքննվել են՝ հայտնելով ոտնձգությունների և սպառնալիքների մասին՝ կապված իրենց լրագրողական գործունեության և քննադատական զեկույցների հետ: 2024 թվականի մարտի սկզբին ոստիկանությունը ներխուժել է Toplum TV անկախ առցանց հեռուստաընկերության գրասենյակներ և բերման ենթարկել դրա հիմնադիր Ալեսկեր Մամեդլիին և լրագրող Մուշֆիգ Ջաբբարին։ Ես նաև անհանգստությամբ հետևել եմ Ադրբեջանում իրենց օրինական գործունեության համար կալանավորված կամ ոտնձգությունների ենթարկված այլ մարդկանց իրավիճակին, ներառյալ՝ Գուբադ Իբադօղլուն, որը կալանքի տակ գտնվելիս տառապում է մի շարք առողջական խնդիրներից»,- ասվում է հայտարարության մեջ։
Միյատովիչը նշում է, որ 2019 թվակակից բազմիցս Ադրբեջանի իշխանությունների ուշադրությունն է հրավիրել խոսքի և լրատվամիջոցների ազատության հետ կապված վատթարացող իրավիճակի, ինչպես նաև շարունակվող թշնամական միջավայրի վրա՝ իրավապաշտպանների և քաղաքացիական հասարակության ակտիվիստների համար, որոնք բախվում են ոտնձգությունների, ահաբեկումների և հաշվեհարդարների։
«Ցավոք, իշխանությունները շարունակել են խիստ անտեսել այս ոլորտներում մարդու իրավունքների նկատմամբ իրենց պարտավորությունները՝ դրանով իսկ սրելով իրավիճակը երկրում»,- նշում է մարդու իրավունքների հանձնակատարը՝ հավելելով, որ անցյալ ամիս Բաքվի դատարանը 9 տարվա ազատազրկման է դատապարտել անկախ լրագրող Ավազ Զեյնալլիին, որին ազատ արձակելու կոչ է նախկինում ուղղել Ադրբեջանի իշխանություններին։
«Ես կոչ եմ անում Ադրբեջանի կառավարությանը՝ վճռական քայլեր ձեռնարկել մարդու իրավունքների իր պարտավորությունների լիարժեք հարգումն ապահովելու համար։ Սա պահանջում է ազատ արձակել բոլոր նրանց, ներառյալ՝ լրագրողներին և քաղաքացիական հասարակության ակտիվիստներին, որոնք բանտարկվել են իրենց օրինական աշխատանքի կամ քննադատական կարծիքներ արտահայտելու համար, ինչպես նաև ստեղծել բարենպաստ միջավայր լրագրողների, քաղաքացիական հասարակության և իրավապաշտպանների գործունեության համար, այդ թվում՝ արտահայտվելու և խաղաղ հավաքների ազատությունների իրավունքներից օգտվելու հետ կապված»,- ընդգծում է Դունյա Միյատովիչը։
