07.12.2025 | 15:56
Մերցը Նեթանյահուի հետ է հանդիպել
Բելառուսից պաշտոնական նամակ չենք ստացել․ ՍԱՏՄ-ն՝ ԱԿԶ «Արարատի կոնյակի գործարան»-ի արտադրանքում հնարավոր խախտման մասին
Տնտեսություն
26.03.2024 | 12:09
Բելառուսի առողջապահության փոխնախարար, երկրի գլխավոր սանիտարական բժիշկ Ալեքսանդր Տարասենկոն հրամանագիր է ստորագրել, որով արգելվում է ՀՀ-ում գործող ԱԿԶ «Արարատի կոնյակի գործարան»-ից ապրանքների ներմուծումն ու վաճառքը։ 2024 թ-ի մարտի 19-ով թվագրված փաստաթղթում ասվում է, որ որոշումը կայացվել է գործարանի արտադրած գինիներից մեկում «սինթետիկ ներկանյութ ազորուբինի հայտնաբերման հետ կապված»։ Նշվում է, որ փորձաքննության արդյունքներով սինթետիկ ներկանյութը հայտնաբերվել է նռան «Այրում» գինու մեջ։
Ըստ հրամանագրի՝ ԱԿԶ «Արարատի կոնյակի գործարան»-ի բոլոր ապրանքները պետք է հանվեն Բելառուսի վաճառակետերից։
Բելառուսի հանրապետությունից պաշտոնական նամակ չի ստացվել հնարավոր սինթետիկ ներկանյութի հայտնաբերման հետ կապված, այս մասին Factor.am-ին տեղեկացրեց ՍԱՏՄ իրազեկման, խորհրդատվության և հանրության հետ տարվող աշխատանքների բաժնի պետ Անուշ Հարությունյանը։
Հարցի առնչությամբ Factor.am-ը փորձեց պարզաբանում ստանալ ԱԶԿ «Արարատի կոնյակի գործարան»-ից, սակայն մեր բոլոր հեռախոսազանգերն անպատասխան մնացին։
Իսկ «Արարատ» կոնյակի գործարանից հայտնեցին, որ իրենք որևէ առնչություն չունեն ԱԶԿ «Արարատի կոնյակի գործարան»-ի հետ։ Հասարակայնության հետ կապերի պատասխանատու, մենեջեր Զարուհի Սարիբեկյանը նշեց, որ Բելառուսի առողջապահության նախարարության հայտարարությունը կապ չունի իրենց գործարանի և իրենց անվանական խմիչքներից որևէ մի տեսակի հետ։
«Լուրը չի վերաբերում Երևանի «Արարատ» կոնյակի գործարանի արտադրանքին։ Բացառում ենք, որ Բելառուսի նշած գործարանը կարող է լինել մեր դուստր ձեռնարկությունը» ,- ասաց Զարուհի Սարիբեկյանը։
