Հասարակություն
24.03.2024 | 14:17
ՆԳՆ Ոստիկանությունը ձերբակալել է 23 անձի, այդ թվում նաև՝ «Մարտական եղբայրություն» կազմակերպության անդամների։ Factor TV-ի հետ զրույցում Ոստիկանության Լրատվական ծառայությունից որպես ձերբակալման պատճառ նշեցին ապօրինի զենք-զինամթերք կրելու և պահելու կասկածանքը։ Թեև Ոստիկանությունը մեզ հայտնեց 23 ձերբակալվածների մասին, կազմակերպությունը նշում է 3 տասնյակից ավելի բերման ենթարկվածների մասին։ Ըստ ամենայնի, նրանց թվում են Հրանտ Տեր-Աբրահամյանը, ում հետ «Մարտական եղբայրության» կապը ընդհատվել է։ Բերման ենթարկվելու մասին է հայտնել նաև Հովսեփ Ղազարյանը։ Նշվում է, որ կապից դուրս են նաև և հավանաբար ձերբակալված են նաև Մարտական Եղբայրության անդամ Մասիս Շիրոյանը, Ավետիս Ավետիսյանը։
Նախօրեին «Մարտական եղբայրությունը» տեղեկացրել էր ՀՀ Ոստիկանության պետի տեղակալ Վարդան Վարդանյանի և Հրանտ Տեր-Աբրահմյանի զրույցի մասին, որը տեղի է ունեցել Ոստիկանության շենքում (6-րդ վարչություն): Ըստ կազմակերպության՝ զրույցի ընթացքում Վարդան Վարդանյանը հայտնել է, որ չեն թույլատրելու Մարտական եղբայրության այցը Վերին Ոսկեպար:
«Ի պատասխան Հրանտ Տեր-Աբրահամյանը խնդրել է ներկայացնել արգելքի օրինական՝ իրավական հիմքերը` շեշտելով, որ Մարտական եղբայրությունն օրենք չի խախտում: Հրանտ Տեր-Աբրահամյանը նաև ներկայացրել է, որ Եղբայրությունը գաստրոլյորի կարգավիճակով չի գնում Նոյեմբերյանի տարածաշրջան, այլ գրեթե մեկ տարի այնտեղ գործ է անում` բարձրացնելով տեղացիների ինքնապաշտպանության կարողությունները: Դա արվել է տեղի ինքնակառավարման մարմինների հետ համաձայնեցված: Այժմ էլ այցի նպատակն է այդ նույն գործի շարունակությունը, ինչպես նաև տեղի ժողովրդին ցույց տալը, որ իրենք մենակ չեն: Վարդան Վարդանյանը հայտնել է, որ այցը պետք է չեղարկվի՝ ելնելով անվտանգության նկատառումներից։ Ոստիկանության տեղեկությունների համաձայն՝ կոնկրետ մարտի 24-ի մասին ադրբեջանական լրատվամիջոցներում տեղեկություն է տարածվել, որ ահաբեկիչներ են գալու Ոսկեպարի տարածք»:
Չնայած Ոստիկանության դիրքորոշմանը, «Մարտական Եղբայրության» անդամների մի խումբ հասել է Ոսկեպար։
Ավելի ուշ «Մարտական եղբայրություն» կազմակերպությունը հայտնեց, որ ձերբակալվածների թիվը հասել է 49-ի։
