26.04.2026 | 21:21
Իրավիճակը Մալիում․ մահացել է պաշտպանության նախարարը, երկրում թեժ մարտեր են
2 խոշոր հարկատուներ ճանաչվել են օրինապահ հարկ վճարող, բայց հայտնվել պետական գնումների «սև ցուցակում»
Տնտեսություն
19.03.2024 | 17:40
Պետական եկամուտների կոմիտեն 13 ընկերությունների մերժել է ճանաչել օրինապահ հարկ վճարող։ Նրանց անունները ՊԵԿ-ը չի հրապարակում՝ հղում անելով հարկային և առևտրային գաղտնիքին։
Factor․am-ի հարցմանն ի պատասխան ՊԵԿ-ից հայտնեցին, որ այս տարվա սկզբից 48 ընկերություն է դիմել ՊԵԿ՝ օրինապահ հարկ վճարողի հավաստագիր ստանալու համար։ Այդ կոչմանն արժանացել է 39 ընկերություն, որոնցից 7-ը դիմումը ներկայացրել էր դեռ անցած տարի։ 2023 թ-ի տարեվերջի դրությամբ օրինապահի հավաստագիր ուներ 81 հարկ վճարող։
ՊԵԿ-ից հայտնեցին նաև, որ ներկայում ուսումնասիրության ընթացքում է գտնվում 3 դիմում։ Ուշագրավ է, որ օրինապահ ճանաչված ընկերություններից միայն 10-ն է ներառված 2023 թ-ի 1000 խոշոր հարկ վճարողների ցանկում։
Առավել ուշագրավ է, որ 2 օրինապահներ ներկայում գտնվում են պետական գնումների «սև ցուցակում», 2-ն էլ խոշոր հարկ վճարող են։ Դրանք «Վենդա» և «Ապավեն» ընկերություններն են։ «Վենդան» զբաղվում է սննդամթերքի, ալկոհոլի և ծխախոտի առևտրով։ Այս ընկերությանն է պատկանում նաև «Չայկոֆֆ» սուրճի և թեյի խանութների ցանցը, սեփականատերը Արկադի Հարությունյանն է։ «Ապավենը» զբաղվում է տրանսպորտային փոխադրումներով, հավասար չափով սեփականատեր են Արսեն Ղազարյանը և Գագիկ Աղաջանյանը։
Հանուն արդարության պետք է նշել՝ ֆինանսների նախարարության «սև ցուցակում» 2 ընկերություններն էլ հայտնվել են օրինապահ հարկ վճարողի հավաստագիրը ստանալուց հետո։
Գայանե Խաչատրյան
