09.06.2026 | 23:19
Կանանց Հայաստանի հավաքականը 0:6 հաշվով պարտվեց Բելառուսին. ՏԵՍԱՆՅՈՒԹ
Փաշինյանն ասել է՝ Ադրբեջանի վերահսկողության տակ գտնվող մեր հողերը վերադարձնելու ենք․ Կիրանցի վարչական ղեկավար
Քաղաքականություն
18.03.2024 | 16:45
ՀՀ վարչապետ Նիկոլ Փաշինյանը Կիրանցում հանդիպել է բնակիչների հետ: Այս մասին տեղեկացնում են ՀՀ վարչապետի աշխատակազմից։ Գյուղացիները վարչապետի հետ խաղաղության օրակարգի հետ կապված հարցեր են քննարկել, Factor.am-ի հետ զրույցում փոխանցեց Իջևան խոշորացված համայնքի Կիրանց գյուղի վարչական ղեկավար Կամո Շահինյանը։
Շահինյանի խոսքով՝ միակ բանը, որն այս պահին հետաքրքրում է գյուղացիներին՝ խաղաղությունն է։ Վարչական ղեկավարը նշեց, որ Նիկոլ Փաշինյանն իրենց ասել է՝ որևէ գյուղ չի հանձնվում, այլ՝ սահմանազատում է իրականացվելու։ Ադրբեջանի՝ Տավուշի մարզից 4 գյուղերի պահանջի վերաբերյալ Կիրանցի գյուղապետն ասում է, որ դրանք ադրբեջանական գյուղեր են։ Շահինյանի խոսքով՝ մենք էլ Ադրբեջանի տարածքում հողեր ունենք։
«Մերն իրանցից շատ է, թողնենք մեր հողերն իրենց մո՞տ մնան։ Սահմանազատում պետք է կատարվի, սահմանի գծով սահմանազատում պետք է անենք և մեր հողերը վերցնենք։ Մեր պահանջը դա է։ Մեր պահանջը ներկայացրել ենք Փաշինյանին, վարչապետն էլ մեզ ասել է, որ հենց այդպես էլ պետք է լինի, որ Ադրբեջանի վերահսկողության տակ գտնվող մեր հողերը պետք է վերադարձնենք․ 31 գյուղի հողատարածքները պետք է հետ վերադարձնենք։ Եթե Ադրբեջանը սահմանազատման միջոցով մեր հողատարածքները չվերադարձնի, մենք պետք է կռվենք»,- կարծիք հայտնեց նա։ Դիտարկմանը՝ ի վիճակի՞ ենք կռվելու, Կիրանցի վարչական ղեկավարն արձագանքեց՝ միանշանակ։
Իր հերթին ԱԺ «Հայաստան» խմբակցության պատգամավոր Գառնիկ Դանիելյանը ֆեյսբուքյան գրառմամբ հանդիպումից մանրամասներ է հայտնել՝ պնդելով, որ Փաշինյանը տավուշցիների հետ հանդիպմանը հայտնել է, որ 4 գյուղերը պետք է անհապաղ հանձնել Ադրբեջանին, այլապես պատերազմ կլինի։
«Ինչպես հայտնի է՝ Նիկոլ Փաշինյանն այսօր անակնկալ այց է կատարել Տավուշի մարզ: Ոսկեպար համայնքում տեղի է ունեցել հանդիպում մարզպետի, Նոյեմբերյան խոշորացված համայնքի ղեկավարի և մի քանի գյուղերի վարչական ղեկավարների ներկայությամբ:
Փաստենք, որ նշված հանդիպմանը ներկա չեն եղել զանգվածային լրատվության ներկայացուցիչները:
Այսինքն՝ Փաշինյանն իր հետ տարած մի տեսախցիկով փորձելու է ստեղծել շինծու տպավորություններ և հերթական անգամ մոլորեցնել հանրությանը:
Հանդիպմանը մասնակից մարդկանց ձեռքից հավաքել են հեռախոսները և այլ իրեր: Այն ացնել է թեժ մթնոլորտում:
Նիկոլ Փաշինյանը հայտնել է, որ 4 գյուղերը պետք է անհապաղ հանձնել Ադրբեջանին, այլապես պատերազմ կլինի, Ադրբեջանը ուժով կվերցնի, իսկ մենք չենք կարող դիմակայել:
Հանդիպման մասնակիցները հարց են ուղղել՝ արդյո՞ք այդ գյուղերի հանձնմամբ Ադրբեջանին չի անցնի նաև միջպետական ճանապարհը, որտե՞ղ են դրա արդյունքում հայտնվելու ադրբեջանցիները, և արդյո՞ք երաշխավորվում է դրանով, որ պատերազմ չի լինի:
Փաշինյանն պատասխանել է՝ չի կարող երաշխավորել, և կարող է ընդամենը հուսալ, որ չի լինի պատերազմ և կփորձի այնպես անել, որ այդ ճանապարհներն անվտանգ կլինեն: Նա նաև հայտնել է, որ Ադրբեջանի հետ նաև Թուրքիան է, և այլ ճար չկա՝ պետք է տանք:
Փաշինյանը կոնկրետ ժամկետներ չի նշել, սակայն մեր տեղեկություններով՝ այցի նպատակը հենց գործողություններն արագացնելն է եղել:
Եվ չնայած որ Փաշինյանն իր հետ նաև մարդիկ է տարել՝ որոշակի մեղմ ֆոն ստեղծելու նպատակով, այդուհանդերձ, գյուղացիները բավականին սուր հարցեր են ուղղել՝ փորձելով հասկանալ, թե, ի վերջո, ադրբեջանցիները որտե՞ղ են կանգ առնելու: Փաշինյանը կրկին իրեն հատուկ մանիպուլացնող ոճով պատասխանել է, որ կաշխատեն այլընտրանքային ճանապարհներ կառուցել և այլն:
Փաստենք, որ սրանով հաստատվում են մեր բոլոր մտահոգությունները. օկուպացիոն ռեժիմի սույն պարագլուխն Ադրբեջանի հետ միասին դուրս է եկել հայ ժողովրդի դեմ և պատերազմի սպառնալիքներով, խաղաղության խոստումներով փուլ առ փուլ հասնելու է նրան, որ մի օր այդ «դեմարկացիան» տեղի ունենա Երևանում»,- գրել է Դանիելյանը:
Հիշեցնենք, որ մինչ այս վարչապետը Ոսկեպարում հանդիպել էր Ոսկեպարի, Բաղանիսի և հարակից բնակավայրերի բնակիչների հետ։
Փաշինյանն օրերս կայացած մամուլի ասուլիսում անդրադառնալով Ադրբեջանի՝ 4 գյուղերի պահանջին՝ ասել էր, որ դրանք՝ դե յուրե Հայաստանի տարածքում չեն։ Փաշինյանը նաև չէր բացառել, որ սահմանազատումը պետք է սկսել Տավուշի մարզից։ Նիկոլ Փաշինյանը ասուլիսի ժամանակ նաև հայտնել էր, որ առաջիկայում պատրաստվում է այցելել Ոսկեպար և տեղում բնակիչներին ներկայացնել իրավիճակը։
Մանյա Պողոսյան
