Պուտինը 87,31% ձայն է հավաքել նախագահական ընտրություններում․ Արևմուտքը չի ընդունում արդյունքները
Քաղաքականություն
18.03.2024 | 11:11![](https://factor.am/wp-content/uploads/2024/03/tass_68302691_44f.jpg)
Ռուսաստանի Կենտրոնական ընտրական հանձնաժողովը հայտնում է, որ ՌԴ նախագահական ընտրությունների արձանագրությունների 99,7%-ի մշակման արդյունքներով՝ Վլադիմիր Պուտինն առաջատար է՝ հավաքելով ձայների 87,31%-ը։ Նիկոլայ Խարիտոնովը (ՌԴ Կոմունիստական կուսակցություն) հավաքել է 4,3%, Վլադիսլավ Դավանկովը («Նոր մարդիկ») ՝ 3,83 %, Լեոնիդ Սլուցկին (ԼԴՊՌ)՝ 3,21% ձայն։
Պուտինն ամենաշատ ձայները հավաքել է Չեչնիայի Հանրապետությունում․ քվեաթերթիկների 100%-ի հաշվարկի արդյունքներով՝ նա ստացել է 98,99% ձայն: Բռնակցված Ղրիմում Պուտինն ունի 93,60%, Մոսկվայում՝ 85,13% ձայն, գրում է Current Time-ը։
Նախագահական ընտրություններում Պուտինին «տրված ձայների թիվը» գերազանցել է 58 միլիոնը, ինչն ամենաբարձր ցուցանիշն է 1991 թվականից ի վեր։
Մեծ Բրիտանիայի արտաքին գործերի նախարար Դեյվիդ Քեմերոնը հայտարարել է, որ Ռուսաստանում նախագահական ընտրություններն ազատ ու արդար չեն եղել։ Նրա խոսքով՝ «Ուկրաինայի տարածքում ընտրությունների անօրինական անցկացումը, ընտրության և ԵԱՀԿ-ի կողմից անկախ մոնիթորինգի բացակայությունն այն չէ, ինչ լինում է ազատ և արդար ընտրությունների ժամանակ»։
ԱՄՆ-ը նույնպես Ռուսաստանի ընտրություններն ազատ և արդար չի համարում։ Գերմանիայի ԱԳՆ-ն քվեարկությունն անվանել է«կեղծ ընտրություններ, որոնց արդյունքը ոչ ոքի չի զարմացնում»։ Լեհաստանի ԱԳՆ-ն նույնպես հայտարարել է, որ Ռուսաստանում ընտրությունները չեն կարող համարվել ազատ ու արդար։
Հիշեցնենք, որ մարտի 15-ին մեկնարկած եռօրյա նախագահական ընտրություններում Կենտրոնական ընտրական հանձնաժողովը որևէ անկախ ընդդիմադրի կամ հակապատերազմական հայացքներ ունեցող թեկնածուի չէր գրանցել։