Երևանի քաղաքապետարանի պաշտոնյան կալանավորվել է․ ով է նա

Երևանի քաղաքապետարանի պաշտոնյան, որը երեկ Հակակոռուպցիոն կոմիտեի քննիչների կողմից կատարված խուզարկությունների արդյունքում ձերբակալվել էր, այսօր կալանավորվել է։ Տեղեկությունը Factor.am-ին հայտնեց կոմիտեի մամուլի խոսնակ Մարինա Օհանջանյանը։

Հիշեցնենք՝ Հակակոռուպցիոն կոմիտեն քննչական գործողություններ էր իրականացրել քաղաքապետարանի երկրորդ մասնաշենքում տեղակայված ճարտարապետության և քաղաքաշինության վարչությունում։

Factor.am-ի տեղեկություններով՝ կալանավորված պաշտոնյան այդ վարչության ինժեներական ենթակառուցվածքների բաժնի առաջատար մասնագետ Քնարիկ Պետրոսյանն է։ Նրան մեղադրանք է առաջադրվել կաշառք ստանալու համար։

Բացի Քնարիկ Պետրոսյանից, ձերբակալվել էր ևս 4 անձ, որոնք քաղաքապետարանում չեն աշխատում։ Ձերբակալվածներից մեկին մեղադրանք է առաջադրվել կաշառք տալու, մյուսին՝ կաշառք ստանալու համար։ Նշված երկուսը կալանավորվել են։ Այսինքն՝ երեկ ձերբակալված անձանցից 3-ն այս պահին կալանքի տակ են։

Հավելենք, որ երեկ Քաղաքապետարանի աշխատակազմի ճարտարապետության և քաղաքաշինության վարչությունում քննչական գործողությունն իրականացվել է Հակակոռուպցիոն կոմիտեում քննվող կոռուպցիոն գործի շրջանակներում: Factor TV-ի տեսախցիկն արձանագրել էր` ինչպես են քաղաքապետարանի 2-րդ մասնաշենքից աշխատակիցները հեռանում` տանելով փաթեթավորված իրեր և փաստաթղթեր:

Արփի Հակոբյան