12.01.2026 | 23:30
Գերմանիան և Հնդկաստանն ընդլայնում են ռազմական համագործակցությունը
Օսկար 2024. «Օպենհայմերը»՝ գլխավոր դափնեկիր
Քաղաքականություն
11.03.2024 | 11:01
Լոս Անջելեսում կայացել է «Օսկար»-ի 96-րդ մրցանակաբաշխությունը, որի գլխավոր դափնեկիրն է դարձել «Օփենհայմեր» ֆիլմը՝ ստանալով 7 մրցանակ։ Ֆիլմն, ընդհանուր առմամբ, արժանացել է յոթ Օսկարի (առաջադրվել է 13 անվանակարգերում), գրում է BBC-ի ռուսական ծառայությունը։
Քրիստոֆեր Նոլանն «Օսկար» է ստացել նաև «Լավագույն ռեժիսոր» անվանակարգում, որը նրան է հանձնել Սթիվեն Սփիլբերգը։ Սա Նոլանի առաջին «Օսկարն» է իր կարիերայում՝ չնայած 2018 թվականին նա նույն անվանակարգում առաջադրվել էր «Դանկերք» ֆիլմի համար։ Նոլանի հետ այս տարի մրցում էին Ջասթին Տրիեն («Անկման անատոմիա»), Մարտին Սկորսեզեն («Ծաղկի լուսնի մարդասպանները»), Յորգոս Լանտիմոսը («Խեղճ դժբախտները») և Ջոնաթան Գլեյզերը («Շահերի գոտին»):
Իռլանդացի դերասան Կիլիան Մերֆին, որը մարմնավորել է Օպենհայմերին, նույնպես ստացել է իր առաջին «Օսկարը» «Լավագույն դերասան» անվանակարգում։ Նախկինում նրա աշխատանքը այս ֆիլմում արդեն արժանացել էր բրիտանական BAFTA մրցանակին և Ոսկե գլոբուսին։
Ռոբերտ Դաունի Կրտսերն արժանացել է «Երկրորդ պլանի լավագույն դերասան» մրցանակին։
Էմմա Ստոունն արժանացել է իր երկրորդ Օսկարին՝ ստանալով «Լավագույն դերասանուհի» մրցանակը «Խեղճ դժբախտներ» (Poor things) ֆիլմի գլխավոր կերպարին մարմնավորելու համար։ Նախորդ Օսկարը «Լավագույն դերասանուհի» անվանակարգում Ստոունը ստացել էր 2016 թվականին «Լա Լա Լենդ» ֆիլմի համար։
«Երկրորդ պլանի լավագույն դերասանուհի» մրցանակը բաժին է հասել Դա Վին Ջոյ Ռենդոլֆին՝ «Թողնվածները» ֆիլմի համար։
2023 թվականին ամենաշատ եկամուտ բերած «Բարբի» ֆիլմն արժանացել է մրցանակի լավագույն երգի համար (What was I made for?), որը գրել են Բիլլի Այլիշը և նրա եղբայր Ֆիննեաս Օ’Քոննելը։
