Մոսկվայում ապաստանած երկու հայ գեներալները նոր կուսակցություններ են հիմնել

Սերժ Սարգսյանի նախկին թիմակից, ԴԱՀԿ նախկին պետ, հետախուզման մեջ գտնվող գեներալ Միհրան Պողոսյանն օրեր առաջ ՀՀԿ-ից դուրս գալու դիմում է գրել, նոր կուսակցությունն է հիմնել և ստանձնել այդ ուժի նախագահությունը։ Այս մասին նա հայտնել է «Մեդիահաբին» տված հարցազրույցում։

«Մենք բացել ենք կուսակցություն, որը կոչվում է «Հայոց համազգային միասնություն»»,-հայտարարել է Պողոսյանը։ ԴԱՀԿ նախկին պետի ձևակերպմամբ՝ ինքը «համախմբելու է Հայաստանի ապագայով մտահոգված հայերին»։

Հիշեցնենք` Միհրան Պողոսյանը հետախուզման մեջ է` առանձնապես խոշոր չափերով գույքի հափշտակման ու պաշտոնեական դիրքը չարաշահելու մեղադրանքով։ Նա 5 տարի է չի բնակվում Հայաստանում, հանգրվանել է Ռուսաստանի Դաշնությունում։

Իշխանափոխությունից հետո Միհրան Պողոսյանը հետախուզման մեջ է առանձնապես խոշոր չափերով գույքի հափշտակման ու պաշտոնեական դիրքը չարաշահելու մեղադրանքով։ Մոսկվան հրաժարվում է նրան արտահանձնել ՀՀ արդարադատությանը։ Պողոսյանին 2023 թվականի դատախազությունը նոր մեղադրանք առաջադրեց՝ հանցավոր ճանապարհով ստացված առանձնապես խոշոր չափերով գույքն օրինականացնելու (փողերի լվացում), առանձնապես խոշոր չափերով վստահված գույքը հափշտակելու, պաշտոնեական դիրքն օգտագործելով՝ խոշոր չափերով վատնում կատարելու, պաշտոնեական լիազորությունները չարաշահելու և պաշտոնեական լիազորություններն անցնելու մեջ:

Միհրան Պողոսյանը ԱԱԾ տնօրենի նախկին տեղակալ, Սերժ Սարգսյանի մտերիմ ընկեր Գրիգորի Հարությունյանի քրոջ որդին է։ Պողոսյանն իր մասնագիտական առաջխաղացման համար, ըստ էության, պարտական է քեռուն։

Հայաստանը Ռուսաստանում փրկողների պակաս չկա․ վերջերս կուսակցություն հիմնելու մասին հայտարարեց նաև Պաշտպանության նախկին նախարար Արշակ Կարապետյանը․ կուսակցությունը կոչվում է «Համահայկական ճակատ»։

Գեներալ Արշակ Կարապետյանը առանցքային պաշտոններ է զբաղեցրել թե՛ Սերժ Սարգսյանի, թե՛ Նիկոլ Փաշինյանի կառավարման ընթացքում։ Կարապետյանը 2016 թվականի քառօրյա պատերազմի ժամանակ զբաղեցրել է Զինված ուժերի Գլխավոր շտաբի հետախուզության վարչության պետի պաշտոնը, իսկ մարտական գործողություններից հետո Սերժ Սարգսյանի կողմից պաշտոնանկ է արվել՝ թերացումների հիմնավորմամբ։ Բայց այս հանգամանքը չխանգարեց, որ Սերժ Սարգսյանը հետագայում Կարապետյանին ՌԴ-ում ՀՀ դեսպանատանը ռազմական կցորդ նշանակի։
Իսկ ահա Նիկոլ Փաշինյանի իշխանության շրջանում Արշակ Կարապետյանը նշանակվեց ՀՀ վարչապետի խորհրդական՝ պաշտոնավարելով մինչև 2021 թվականի ապրիլ։ Այնուհետև նա ՊՆ-ում զբաղեցրել է ԳՇ պետի տեղակալի, պաշտպանության նախարարի առաջին տեղակալի և նախարարի պաշտոնները, պաշտոնանկ է արվել 2021 թվականի նոյեմբերին։
Արշակ Կարապետյանի թերացումներն արձանագրել է նաև Փաշինյանի թիմակից Անդրանիկ Քոչարյանի ղեկավարած ԱԺ քննիչ հանձնաժողովը, որն ուսումնասիրում էր քառօրյա պատերազմի հանգամանքերը։ Այս մասին ավելի վաղ Factor TV-ի հետ զրույցում ասել էր հանձնաժողովի անդամ, 7-րդ գումարման խորհրդարանի պատգամավոր Գևորգ Գորգիսյանը։

Նարեկ Կիրակոսյան