Եթե Լարսը փակվի, այդ ժամանակ մենք ուղղակի ԵՏՄ-ի անդամ չենք լինի․ Հովիկ Աղազարյան

Factor.am-ը երեկ հայտնել էր, որ Ազգային ժողովում վարչապետ Նիկոլ Փաշինյանը փակ հանդիպում է անցկացրել ԱԺ «Քաղաքացիական պայմանագիր» խմբակցության հետ:

Նախքան հանդիպումը իշխանականության ներկայացուցիչները հրաժարվել էին բացահայտել քննարկումների օրակարգը։ Ավելի ուշ պարզ դարձավ, որ քննարկվել են Հայաստանի տնտեսական զարգացմանը առնչվող հարցեր:

Factor.am-ը այսօր փորձեց «Քաղաքացիական պայմանագիր» խմբակցության պատգամավոր, ԱԺ տնտեսական հարցերի մշտական հանձնաժողովի անդամ Հովիկ Աղազարյանից հանդիպման մասին որոշ մանրամասներ պարզել։

Պատգամավորի խոսքով՝ կառավարության անդամների և վարչապետի հետ քննարկվել են տնտեսական անվտանգության հարցեր, մասնավորապես՝ Թուրքիայի, Ադրբեջանի, ինչպես նաև Ռուսաստանի Դաշնության հետ հարաբերությունների շուրջ զարգացումները տնտեսական ինչ մարտահրավերներ կարող են առաջացնել մեր երկրի համար և Հայաստանն ինչպիսի լուծումներ պետք է փնտրի։

Հետաքրքրվեցինք՝ օրինակ, եթե Մոսկվան որոշի չթույլատրել հայկական այս կամ այն ապրանքի արտահանումը, ի՞նչ այլընտրանք են առաջարկելու տեղական արտադրողին։ Իշխող խմբակցության պատագմավորը պատասխանեց՝ եթե մենք ԵԱՏՄ անդամ ենք, ուստի, Լարսի հնարավոր փակումն անհավանական է համարում։

«Մենք կարող է արտադրատեսակ ունենանք, որը հնարավոր է Ռուսաստանում պահանջված չլինի, այդ ապրանքը մենք պետք է փորձենք այլ շուկաներում իրացնել, այդ հարցերն ենք քննարկել։ Եթե կլինի նման իրավիճակ, որ Լարսը կփակվի, այդ ժամանակ մենք ուղղակի ԵՏՄ-ի անդամ չենք լինի, հետևաբար, այս իմաստով անհանգստությունները տեղին չեն»,- ասաց տնտեսական հարցերի մշտական հանձնաժողովի անդամը։ Ըստ նրա՝ անհանգստանալու փոխարեն պետք է տեղական արտադրանքի որակը բարձրացնել, որպեսզի արտահանումը կախված չլինի Հայաստան- Իրան և Հայաստան-Ռուսաստան հարաբերություններից։

Պատգամավորը մանրամասնեց, որ քննարկել են նաև Թուրքիայի հետ հարաբերությունների հնարավոր վերականգման հետ կապված հարցեր։
«Ես չեմ բացառում, որ Թուրքիայի հետ սահմանների բացման, ազատ շուկաների դեպքում մեր որոշ ապրանքների իրացման հարցում դժվարություններ լինեն, բայց դա է զարգացման ճանապարհը»,- ասաց նա։

Ի դեպ, ՔՊ-ական պատգամավորը հերքեց տեղեկությունները, թե վարչապետի և փոխվարչապետ Մհեր Գրիգորյանի հետ հանդիպմանը քննարկվել է, այսպես կոչված, անկլավների՝ Ադրբեջանին վերադարձնելու հարցը։

Աղազարյանը վստահեցրեց՝ շուրջ 4 ժամ տևած հանդիպմանն Ադրբեջանի հետ սահմանանագծման և սահմանազատման հարցերից չեն խոսել։

Նշենք, որ երկու օր առաջ էլ Անվտանգության խորհրդի քարտուղար Արմեն Գրիգորյանն էր ՔՊ-ական պատգամավորների հետ փակ հանդիպում ունեցել։ Գրիգորյանի փոխանցմամբ՝ այդ հանդիպմանը ևս քննարկել էին տնտեսական անվտանգության հարցեր։

Հիշեցնենք, որ վերջին տասն օրում Փաշինյանի և թիմակիցների փակ հանդիպումն արդեն երկրորդն էր։

Մանյա Պողոսյան