15.09.2026 | 09:45
Արտարժույթների փոխարժեքները՝ սեպտեմբերի 15-ի դրությամբ
Ալիևը Ֆրանսիային, Եվրախորհրդարանին ու ԵԽԽՎ-ին մեղադրել է իսլամաֆոբիայի մեջ
Քաղաքականություն
08.03.2024 | 16:27
Ադրբեջանի նախագահ Իլհամ Ալիևը Ֆրանսիային մեղադրել է «մահմեդականների նկատմամբ ճնշման քաղաքականության ու խտրականության, ինչպես նաև իսլամաֆոբ արշավների կազմակերպման մեջ»։
«Ֆրանսիան, իր ավանդական նեոգաղութատիրության քաղաքականության հետ մեկտեղ, բացահայտորեն վարում է մուհմեդականների վրա ճնշում գործադրելու և նրանց նկատմամբ խտրականության քաղաքականություն, կազմակերպում է տարբեր իսլամաֆոբ արշավներ»,-ասել է Ալիևը Բաքվում անցկացվող «Բազմազանության պաշտպանությունը, իսլամաֆոբիայի դեմ պայքարը 2024 թ-ին» համաժողովում իր ելույթում։ Նա պնդել է, թե «Ֆրանսիան աշխարհիկության քողի տակ» ընդունում է օրենսդրական ակտեր և քաղաքական որոշումներ, որոնք ուղղված են «բացառապես մահմեդականների իրավունքների և ազատությունների սահմանափակմանը»։
«Ցավոք, իսլամաֆոբիան ներկայումս հանդիսանում է իրենց ժողովրդավարական համարող մի շարք արևմտյան պետությունների պետական քաղաքականության անբաժանելի մասը»,-ասել է Ալիևը՝ պնդելով, թե որոշ արևմտյան ինստիտուտներ, որոնք «իրենց ժողովրդավար են անվանում, նույնպես հակաիսլամական գործունեությամբ են զբաղվում»։
«Այսօր Եվրախորհրդարանը և Եվրոպայի խորհրդի խորհրդարանական վեհաժողովը վերածվել են հարթակների, որոնք քարոզում են իսլամաֆոբիա և այս գաղափարախոսության վրա հիմնված քաղաքականություն են վարում»,-ասել է Ալիևը։
Նշենք, որ ԵԽԽՎ-ն հունվարի 24-ին Ադրբեջանի պատվիրակությանը կառույցից մեկ տարով հեռացնելու ու պատվիրակության լիազորությունները չվավերացնելու որոշում է ընդունել, որն Ադրբեջանում դժգոհության պատճառ է դարձել։ Բացի այդ՝ պաշտոնական Բաքուն անհանգստացած է նաև Եվրախորհրդարանում ՀՀ-ի ու Արցախի դեմ Ադրբեջանի ագրեսիան ու այլ գործողությունները դատապարտող բանաձևերի ընդունմամբ։ Հենց այս պատճառով են այս կառույցները հայտվել Բաքվի հակաքարոզչական թիրախում։
Ի դեպ, վերջին շրջանում Իլհամ Ալիևին մտահոգում են նաև միջազգային մամուլում իր անձին ու ընտանիքին վերաբերող հետաքննական հրապարակումները։ Վերջերս Գերմանիայի տնտեսության արևելյան կոմիտեի նախագահ Մայքլ Հարմսի գլխավորած պատվիրակությանը ընդունելիս նա բողոքել էր՝ ասելով, որ գերմանական մամուլում իր երկիրը ներկայացվում է որպես բռնապետություն։
Էմմա Չոբանյան
