Քաղաքականություն
07.03.2024 | 11:54
Իրանի պաշտպանության ու զինված ուժերի աջակցման նախարար, բրիգադի գեներալ Մոհամմադ Ռեզա Ղարաի Աշթիանին ՀՀ պաշտպանության նախարար Սուրեն Պապիկյանի հետ նախօրեին տեղի ունեցած հանդիպմանն ասել է, որ չպետք է թույլ տալ, որ Կովկասյան տարածաշրջանն այլոց համար դառնա մրցակցության դաշտ։
IRNA-ի փոխանցմամբ՝ նա նշել է, որ «տարածաշրջանից դուրս անվտանգության որոնումը հակառակ արդյունք է տալիս, տարածաշրջանը վերածում է ուժային հակամարտության վայրի և ավելի շատ մարտահրավերներ է առաջացնում տարածաշրջանային խաղաղության և կայունության համար»:
«Բոլոր հարևանների հետ հարաբերությունների ամրապնդումը Իսլամական Հանրապետության արտաքին քաղաքականության մի մասն է, սակայն Հայաստանը հատուկ նշանակություն ունի, և Հայաստանի անկախացումից ի վեր երկու երկրների հարաբերությունները տարբեր ոլորտներում զարգանում են»,- ասել է Աշթիանին։
Իրանի պաշտպանության նախարարը նաև նշել է, որ Թեհրանը միշտ աջակցել է տարածաշրջանում համապարփակ խաղաղությանն ու կայունությանը։ Նա հայտարարել է, որ Իրանի վճռական դիրքորոշումն է՝ աջակցել տարածաշրջանի երկրների տարածքային ամբողջականությանը և իրենց հողերի նկատմամբ ինքնիշխանության իրավունքին և միջազգայնորեն ճանաչված սահմանների անփոփոխությանը։ Աշթիանին նաև ընդգծել է, որ Թեհրանը հավատարիմ է այս քաղաքականությանը Կովկասյան տարածաշրջանում, աջակցում է իր երկու հարևանների՝ Ադրբեջանի և Հայաստանի միջև ուղիղ բանակցություններին և դա համարում է խաղաղության, առաջընթացի և զարգացման հիմք։
Սուրեն Պապիկյանն իր հերթին նշել է՝ շատ կարևոր է, որ երկու երկրներն էլ ունեն նույն տեսակետները տարածաշրջանային կայունության վերաբերյալ և պետք է ձգտել ավելի սերտ հարաբերությունների՝ զարգացման և տարածաշրջանային անվտանգության հասնելու համար։
