05.06.2026 | 02:00
ՌԴ-ից մարդկանց ստիպելով բերում են իրենց օգտին քվեարկելու․ Փաշինյանը՝ «Ուժեղ Հայաստանի» մասին․ ՏԵՍՆՅՈՒԹ
Երևանի բյուջեից 250 հազար դոլար կհատկացվի մայրաքաղաքի մասին ֆիլմի նկարահանման համար
06.03.2024 | 17:30
Երևանի քաղաքապետ Տիգրան Ավինյանի այսօրվա կարգադրությամբ վեց անձի համայնքային բյուջեից մեկական միլիոն դրամ է տրվում՝ Երևանի մասին կարճամետրաժ ֆիլմերի սցենարների մշակման համար։ Այս մասին Factor.am-ը տեղեկանում է Երևանի քաղաքապետարանի պաշտոնական կայքից։
«Լևոն Հախվերդյանին, Վահե Ղազարյանին, Մելինե Հարությունյանին, Գևորգ Շարամբերյանին, Թամարա Աբաջյանին, Գնել Նալբանդյանին Երևանի մասին կարճամետրաժ ֆիլմեր նկարահանելու համար մայրաքաղաքի բյուջեից հատկացվել 1 մլն դրամ (յուրաքանչյուրին)»,- նշված է քաղաքապետի կարգադրությունում։
Երևանի քաղաքապետարանի մշակույթի վարչության պետի տեղակալ Գևորգ Սահակյանը Factor.am-ին փոխանցեց, որ ֆիլմի ընդհանուր բյուջեն 100 մլն դրամ է, այն նկարահանվելու է Հայ կինոյի 100-ամյակի շրջանակներում։ Այս գումարը համարժեք է 250 հազար ԱՄՆ դոլարի։
«Երբ հստակեցվի, թե ֆիլմն ինչ տեսլականով է ներկայացվելու, ովքեր են նկարահանվելու, քանի օր է տևելու արդեն կհասկանանք, թե 100 մլն դրամն ինչպես է բաշխվելու»,- ասաց քաղաքապետարանի պաշտոնյան։ Նրա խոսքով՝ նախապես մրցույթ է հայտարարվել, սցենարները դիտարկվել են առանց հեղինակների անունների բացահայտման։
«Մեր նպատակը ոչ միայն մշակութային արդյունք ստանալն է, այլև տուրիստական։ Ֆիլմը նաև տուրիստական հետաքրքրություն է ունենալու, նմանատիպ շատ օրինակներ կան այլ քաղաքաների վերաբերյալ, մենք ցանկացանք Երևանի մասով էլ անել։ Հինգ տարբեր պատմություններ են լինելու, յուրաքանչյուրը նկարահանելու է տարբեր ռեժիսիոր, տարբեր դերասանական խմբեր են լինելու, համախմբվելու է մեկ անվան տակ ու ներկայացվելու է հանրության դատին։ Կցանկանային, որ նաև դուրս արտահանվեր»,-ասաց նա։
Առայժմ որոշված, թե որ ընկերությանը բաժին կհասնի այդ գումարը՝ ֆիլմը նկարահանելու համար։ Հարցին՝ մրցույթ հայտարարվելո՞ւ է արտադրող ընկերության ընտրության համար, Գևորգ Սահակյանն ասաց․ «Հանձնաժողովը պետք է առաջարկներ ներկայացնի, կորոշենք»։
Նարեկ Կիրակոսյան
