Պեսկովը՝ «Զվարթնոց»-ից ռուս սահմանապահների հեռացման մասին

Ռուսաստանին հայտնի չէ Երևանի «Զվարթնոց» օդանավակայանից ռուս սահմանապահների դուրսբերման մասով որևէ որոշում։ Այս մասին hայտարարել է ՌԴ նախագահի մամուլի քարտուղար Դմիտրի Պեսկովը, փոխանցում է ՏԱՍՍ-ը։

«Ինչ վերաբերում է «Զվարթնոց»-ից սահմանապահների դուրսբերմանը, ապա որևէ որոշում այդ մասով, որքանով հասկանում ենք, չի եղել։ Պաշտոնական խողովակներով էլ մեզ չի հասցվել։ Մենք աշխատում ենք բոլոր ուղղություններով՝ և՛ ԱՊՀ, և՛ ԵՏՄ կառույցներում, երկկողմ հարաբերությունների մակարդակում»,- ասել է Պեսկովը։

Նա նշել է, որ Ռուսաստանն ու Հայաստանն այժմ իրականացնում են «մի շարք կարևոր նախագծեր»։

Ըստ Պեսկովի՝ Ռուսաստանի և Հայաստանի հարաբերություններում դժվարությունները կանցնեն, երկու երկրների համագործակցությունը բացարձակապես փոխշահավետ է։

«Ամենամոտ հարևանները կարող են ունենալ մի շրջան, երբ հարաբերությունները կարող են սրվել, բայց դրա համար անհրաժեշտ է քաղաքական կամք։ Մեր կողմից մենք ունենք կառուցողականություն և հեռատեսություն, երկու երկրների ղեկավարների քաղաքական հեռատեսությունը, մեր կողմից դա ևս կա։ Այդ պատճառով ես համոզված եմ, որ բոլոր դժվարությունները կանցնեն, Ռուսաստանի և Հայաստանի միջև համագործակցությունը բացարձակապես փոխաշահավետ է»,- նշել է Կրեմլի խոսնակը։

Հիշեցնենք, որ ավելի վաղ Factor.am-ին ՀՀ բարձրաստիճան աղբյուրը փոխանցել էր, որ քննարկվում է «Զվարթնոց» միջազգային օդանավակայանից ռուս սահմանապահների հեռացման հարցը։