16.05.2024 | 22:12
Բրյուսելը հետաքննություն է սկսել Meta-ի դեմ՝ անչափահաս օգտատերերի անբավարար պաշտպանության համար
Կինը դատարան էր եկել կոտրված այտոսկրով․ ամուսինը ներողություն խնդրեց
Հասարակություն
05.03.2024 | 22:00
Հ․Մ․-ի դեմքին դեռ առկա են ամուսնու կողմից բռնության հետքերը։ Կնոջը չի հաջողվել վերականգնել անցած տարվա հոկտեմբերին տեղի ունեցած ծեծի հետևանքով առաջացած այտոսկրի կոտրվածքը։ Էրեբունի բժշկական կենտրոնում նրան հայտնել են, որ վերականգնումը 300 հազար դրամ կարժենա։ Հ․Մ․-ն այդ, ինչպես նաև ատամների պրոթեզավորման գումարը ամուսնուց է պահանջում։
Երեկ Արարատի և Վայոց ձորի մարզերի ընդհանուր իրավասոթյան դատարանի Արտաշատի նստավայրում կայացած դատական նիստի ժամանակ տուժողը գույքային հայց ներկայացրեց ամուսնու դեմ։ Կինը ստիպված է եղել 120 հազար դրամ վճարել ատամների պրոթեզավորման համար։ Ընդհանուր առմամբ 420 հազար դրամի պահանջ ունի տուժողը։ Մեղադրյալը դատարանում հայտարարեց, որ ներողություն է խնդրում կնոջից, զղջում է և պատրաստ է մեկ ամսում վճարել պահանջվող գումարը։
Ա․Ք․-ին մեղադրանք է առաջադրվել այն բանի համար, որ նա կենցաղային հարցերի շուրջ կնոջ հետ ծագած վիճաբանության ընթացքում բռունցքներով բազմաթիվ հարվածներ է հասցրել նրա մարմնի տարբեր մասերին, ինչպես նաև դեմքի աջ կեսին՝ վերջինիս պատճառելով կյանքի համար վտանգավոր ծանր մարմնական վնասվածք։
Մեղադրյալը թեև ի սկզբանե հրաժարվել էր պաշտպան ունենալու հնարավորությունից, սակայն երեկվա դատական նիստում, ի վերջո, համաձայնեց դատարանի առաջարկին՝ դիմել Հանրային պաշտպանի գրասենյակ՝ իրեն պաշտպան տրամադրելու նպատակով։ Ակնհայտ էր, որ մեղադրյալը չէր հասկանում դատավոր Սարգիս Հովհաննիսյանի կողմից տրվող հարցերը և չէր կարողանում պատասխանել դրանց։
Դատարանը որոշում կայացրեց հետաձգել դատական նիստը՝ պաշտպան ներգրավելու նպատակով։ Ու թեև տուժողը հայտարարել էր, որ չի առարկում գույքային հայցի դեմ, այնուամենայնիվ, դատարանը որոշեց, որ հայցի քննությունը տեղի կունենա պաշտպանի ներգրավվելուց հետո։ Հաջորդ դատական նիստը նշանակվեց մարտի 26-ին՝ 12։00-ին։
Արման Ղարիբյան
Նկարազարդումը՝ Ելենա Ակոջյանի
