24.04.2026 | 23:32
Կապանում ջրանջատում կլինի
Նաիրի Զարյանի անվան 130 հիմնական դպրոցի տնօրենը արձակուրդում է․ Հակակոռուպցիոն կոմիտեում քրեական վարույթ կա
Հասարակություն
04.03.2024 | 19:19
ՀՀ գլխավոր դատախազությունից Հակակոռուպցիոն կոմիտե է փոխանցվել Նաիրի Զարյանի անվան 130 հիմնական դպրոցին առնչվող երկու քրեական վարույթ, որոնք միացվել և քննվում են մեկ վարույթում։ Տեղեկությունը Factor.am-ին փոխանցեցին Հակակոռուպցիոն կոմիտեից։
Երևանի քաղաքապետարանի լրատվության վարչությունից Factor.am-ին հայտնեցին, որ դպրոցի տնօրեն Նվարդ Հովսեփյանին քաղաքապետի կարգադրությամբ տրվել է չվճարվող արձակուրդ՝ պարտականությունների կատարումը վերապահելով ուսումնական գծով տեղակալին։
Հիշեցնենք, որ վերջին օրերին Նաիրի Զարյանի անվան 130 հիմնական դպրոցում լարված մթնոլորտ էր․ աշակերտները դասադուլ էին իրականացնում, ծնողները՝ բողոքի ակցիա: Ակցիայի մասնակիցները դժգոհում էին այն մեթոդներից, որոնցով տնօրենը շուրջ 1.5 տարի ղեկավարում է դպրոցը: Դպրոցի տնօրենի երեք տեղակալները ներկայացրել էին դիմում՝ տնօրենի տեղակալի իրենց լիազորությունները դադարեցնելու վերաբերյալ։
Քաղաքապետարանից հայտնում են, որ փոխտնօրենների դիմումների քննարկման նպատակով հրավիրված մանկավարժական խորհրդի նիստից առաջ Երևանի քաղաքապետարան են հրավիրվել դպրոցի տնօրենի տեղակալները, քննարկվել են դիմում ներկայացնելու պատճառները, նրանց հուզող խնդիրները, իրավիճակի հաղթահարման տարբերակները:
«Անընդունելի համարելով ուսումնական բնականոն գործընթացի խաթարումը, աշակերտներին նշյալ տարաձայնություններին մասնակից դարձնելը, կրթության իրավունքի ոտնահարումը՝ դպրոցի տօրենի և տնօրենի տեղակալների հետ ձեռք է բերվել պայմանավորվածություն՝ բոլոր ջանքերն ուղղելու լարվածության մթնոլորտի մեղմմանը, ուսումնական բնականոն գործունեության վերականգնմանը, ապա միայն անդրադառնալ բարձրաձայնված խնդիրների լուծմանը»,- նշեցին քաղաքապետարանից:
Անի Թամրազյան
