25.04.2026 | 21:33
Մանվել Խնձրցյանը և Վազգեն Թևանյանը տպավորիչ հաղթանակներով դարձան ԵԱ-ի բրոնզե մեդալակիրներ. ՏԵՍԱՆՅՈՒԹ
Ինձ ի՞նչ է տալիս, որ հովանավորեմ հարկային տեռոր անի․ Ռուստամ Մախմուդյանն իր հասցեին հնչեցված քննադատությունների մասին
Քաղաքականություն
15.08.2018 | 11:36
Օրերս Արտաշատ քաղաքում փոքր և միջին բիզնեսով զբաղվող տնտեսվարողներն ու վաճառականները կազմակերպել էին բողոքի ակցիա և պահանջում էին աշխատանքից ազատել Արտաշատի հարկային գանձումների բաժնի պետ Ռաշիդ Մախմուդյանին։ Ակցիայի մասնակցիները նշում էին, որ Մախմուդյանն իրենց հարկային տեռորի է ենթարկում, իսկ իրենց դժգոհություններն էլ պատկան կառույցներ սույն պաշտոնյայի վերաբերյալ անպատասխան են մնում, քանի որ Ռաշիդ Մախմուդյանի եղբայրը «Հանրապետական» կուսակցության պատգամավոր Ռուստամ Մախմուդյանն է, ով հանդիսանում է եղբոր հովանավորյալը։
Factor.am-ի հետ զրույցում ԱԺ «Հանրապետական» խմբակցության պատգամավոր Ռուստամ Մախմուդյանը բացառեց իր հովանավորչության հանգամանքը և նշեց․
«Եղբայրս հասուն մարդ է, շուրջ 13 տարվա աշխատանքային ստաժ ունեցող տնտեսագիտության թեկնածու։ Ասելուց առաջ,պարզապես, պետք է մտածեն՝ ինձ ի՞նչ է տալիս, որ հովանավորեմ՝ հարկային տեռոր անի։ Եթե մարդն օրենքով իր վրա դրված լիազորություններն է կատարում, և դա, ակցիայի մասնակցիների պատկերացմամբ, կոչվում է տեռոր, ես այստեղ լռում եմ»։
Պատգամավոր Մախմուդյանը հարց է հնչեցնում՝ ես ի՞նչ կապ ունեմ այդ ամենի հետ և շարունակում․
«Տեսնում են, որ եղբորս դեմ փաստեր չունեն, դրա համար էլ ժողովրդահաճո արտահայտություններ են անում, թե եղբայրը ՀՀԿ-ական պատգամավոր է, այո՛, պատգամավոր է, հետո ի՞նչ»։
Հիշեցնենք, որ Factor.am-ի հետ զրույցում ՊԵԿ նախագահ Դավիթ Անանյանը խնդրի վերաբերյալ նշեց, որ կատարվում է ծառայողական քննություն, որի արդյունքների ամփոփումից հետո էլ պարզ կլինի՝ եթե Ռաշիդ Մախմուդյանը գերազանցել է իր լիազորությունները, կենթարկվի պատասխանատվության՝ ընդհուպ մինչև պաշտոնից ազատում։
Աղավնի Սուքիասյան
