15.01.2026 | 15:56
Կրեմլը համաձայն է Թրամփի հետ, որ «Կիևն է արգելակում խաղաղ կարգավորումը»
Բաքվից միջազգային իրավունքի համաձայնեցված սկզբունքները խաղաղության պայմանագրում ներառելու ցանկություն չկա. Ռուբեն Ռուբինյան
Քաղաքականություն
01.03.2024 | 13:31
Անթալիայի դիվանագիտական 3-րդ համաժողովի շրջանակում «Խաղաղություն, զարգացում և փոխկապակցվածություն Հարավային Կովկասում» պանելային քննարկմանը ՀՀ ԱԺ փոխնախագահ Ռուբեն Ռուբինյանն ունեցած ելույթում նշել է, որ հայկական և ադրբեջանական կողմերի համար լավագույն տարբերակը՝ հաստատելու, որ կողմերը ճանաչում են միմյանց տարածքային ամբողջականությունը, մեկը մյուսի նկատմամբ չունեն տարածքային պահանջներ և չեն ունենա այդպիսիք ապագայում, խաղաղության պայմանագիր ստորագրելն է։
Նա, միաժամանակ, ընդգծել է, որ ՀՀ Սահմանադրությունն ու օրենսդրությունը Հայաստանի ներքին հարցն են և խաղաղության գործընթացի հետ կապ չունեն։
Ռուբինյանն ասել է, որ Հայաստանը պատրաստ է համաձայնեցված սկզբունքները խաղաղության պայմանագրում ներառել, որոնք միջազգային իրավունքի հիմնական սկզբունքներն են՝ տարածքային ամբողջականությունը, ինքնիշխանությունը, մեկը մյուսի իրավասությունը հարգելը, բոլոր հաղորդակցությունների բացումը հավասարության սկզբունքի վրա հիմնված։
«Մենք Ադրբեջանից չենք տեսնում ցանկություն՝ այս ամենը արտահայտել թղթի վրա, սակայն հուսով ենք, որ դա կփոխվի»,-ասել է ՀՀ ԱԺ փոխխոսնակը։
Նա նաև հայտարարել է, որ Հայաստանը չի ռազմականացվում, այլ կառուցում է իր պաշտպանությունը։
«Հայաստանն ունի անվտանգային մտահոգություններ, որոնք գալիս են նաև Ադրբեջանից։ Եվ մեր սուվերեն իրավունքն է՝ կառուցել մեր պաշտպանությունը։ Մենք ագրեսիվ մտադրություններ չունենք մեր հարևաններից որևէ մեկի նկատմամբ և ճանաչում ենք բոլորի տարածքային ամբողջականությունը»,- ասել է Ռուբինյանը՝ շեշտելով, որ Բաքուն շարունակում է սպառազինություն գնել տարբեր երկրներից։
