Քաղաքականություն
29.02.2024 | 17:45
ԱԺ նախագահ Ալեն Սիմոնյանն այսօր խորհրդարանում լրագրողների հետ ճեպազրույցում ասել է, որ պլան է եղել Հայաստանը մտցնել Ռուսաստան-Բելառուս միութենական պետության մեջ։
Նրա խոսքով՝ 2021 թվականի ընտրություններով հայ ժողովուրդը աշխարհաքաղաքական մեծ պլան է տապալել։
«Հայ ժողովուրդը 2021 թվականին ընտրեց այն իշխանությանը, որը պետք է հեռանար, որպեսզի գար մի նոր իշխանություն, որ մենք անդամագրվենք միութենական պետությանը։ Հայաստանը դարձնել Ռուսաստան Բելառուս միութենական պետության անդամ․ սա է եղել մեծ պլանը։ Չե՛ք պատկերացնում՝ հայ ժողովուրդը 2021 թվականին ինչ արեց․ աշխարհաքաղաքական հարց է լուծել իր ընտրությամբ՝ միգուցե չգիտակցելով, միգուցե ինչ-որ տեղ գիտակցելով, աշխարհաքաղաքական պլան է տապալել»։
Սիմոնյանը նշեց, որ Հայաստանին պաշտոնապես նման առաջարկ չի եղել։
«Էդպես չեն անում, էնպիսի իրավիճակ են ստեղծում, որպեսզի նոր եկած իշխանույթունը ասի՝ դե նախկինները, այսինքն՝ մենք, մեղավոր են, և այլևս անվտանգային լուծում չկա, քան դառնալ Ռուսաստան-Բելառուս միութենական պետության մաս»,- ասել է Սիմոնյանը։
