27.04.2026 | 22:34
Թուրքիայի ցամաքային զորքերի հրամանատարն այցով Ադրբեջանում է
Չճանաչված Մերձդնեստրի պատգամավորները դիմել են Ռուսաստանին «ՌԴ ավելի քան 220 հազար քաղաքացիների պաշտպանության խնդրանքով»
Քաղաքականություն
28.02.2024 | 18:53
Չճանաչված Մերձդնեստրի «բոլոր մակարդակների» պատգամավորների համագումարի մասնակիցները դիմել են ՌԴ Դաշնային խորհրդին և Ռուսաստանի Պետդումային՝ «պաշտպանության միջոցներ ձեռնարկելու» խնդրանքով «Մոլդովայի կողմից աճող ճնշման» պայմաններում, գրում է Current Time-ը։ Երկու տարի առաջ, նախքան Ուկրաինա Ռուսաստանի ներխուժումը, այսպես կոչված չճանաչված «ԴԺՀ»-ի և «ԼԺՀ»-ի իշխանությունները նույն ձևակերպմամբ հանդես էին եկել նմանատիպ «խնդրանքով»:
«Մերձդնեստրում ապրում է Ռուսաստանի ավելի քան 220 հազար քաղաքացի, Ռուսաստանը մասնակցում է Դնեստրում խաղաղապահ առաքելությանը և հանդիսանում է բանակցային գործընթացի երաշխավոր և միջնորդ»,- ասված է համագումարի որոշման մեջ։
Պատգամավորների հայտարարության մեջ ասվում է, որ Մոլդովան, իբր, «հիմնականում տնտեսական պատերազմ է սանձազերծել Մերձդնեստրի դեմ՝ միտումնավոր ստեղծելով բազմամիլիոնանոց բյուջեի դեֆիցիտի նախադրյալներ», ինչպես նաև «հրաժարվել է իրականացնել Մերձդնեստրի հետ նախկինում ձեռք բերված գրեթե բոլոր պայմանավորվածությունները»:
Սա անջատողական շրջանի պատգամավորների թվով յոթերորդ համագումարն է։ NewsMaker-ը հիշեցնում է, որ նման համագումար ավելի վաղ անցկացվել էր 2006 թվականին, որի ժամանակ պատգամավորները որոշել էին հանրաքվե անցկացնել Ռուսաստանին միանալու վերաբերյալ։ Հանրաքվեն տեղի ունեցավ նույն թվականին, և դրա մասնակիցների 90 տոկոսը «կողմ» քվեարկեց Մերձդնեստրի՝ Ռուսաստանի կազմի մեջ մտնելուն։ Միևնույն ժամանակ, միջազգային հանրությունը և Մոլդովան չճանաչեցին այս հանրաքվեի արդյունքները, և այդպիսով «միացումը» պաշտոնապես չձևակերպվեց։
Մերձդնեստրը փաստացի չի գտնվում Քիշնևի վերահսկողության տակ 1992 թվականից։ Ավելի քան 20 տարի Մերձդնեստրում տեղակայված է մոտ 1700 ռուս զինվորական։ 2022 թվականի մարտի սկզբին Մերձդնեստրի իշխանությունները Մոլդովային կոչ արեցին ճանաչել իրենց անկախությունը և ստորագրել միջպետական համաձայնագիր՝ Մոլդովայի ղեկավարության կողմից Եվրամիությանն անդամակցելու դիմում ներկայացնելու ֆոնին։
Երկու տարի առաջ՝ 2022 թվականի փետրվարի 21-ին, այսպես կոչված «ԴԺՀ» ղեկավար Դենիս Պուշիլինը և «ԼԺՀ» ղեկավար Լեոնիդ Պասեչնիկը պաշտոնապես դիմեցին Ռուսաստանի նախագահ Վլադիմիր Պուտինին՝ Դոնբասի երկու անջատողական միավորումների անկախությունը ճանաչելու խնդրանքով։ Ուղերձը հեռարձակվել էր «Ռոսիա-24» պետական հեռուստաալիքով։ Հետո հաղորդվեց, որ Պուշիլինը և Պասեչնիկը Մոսկվայում են և հավանաբար կմասնակցեն ՌԴ Անվտանգության խորհրդի նիստին, որը շտապ հրավիրել է Պուտինը։ 2022 թվականի փետրվարի 24-ի առավոտյան Պուտինը հայտարարեց Ուկրաինա ներխուժելու մասին։
Սպասվում է, որ վաղը՝ փետրվարի 29-ին, Պուտինը հանդես կգա Դաշնային ժողովում իր ամենամյա ուղերձով։
