ՌԴ-ի կողմից ազատ արձակված ադրբեջանցի բլոգերը վերադարձել է Բաքու

Ռազմական հանցագործությունների համար Հայաստանի կողմից հետախուզվող ադրբեջանցի բլոգեր Քյամիլ Զեյնալին վերադարձել է Բաքու։ Նա նախօրեին ձերբակալվել էր ՌԴ-ի իրավապահների կողմից «Դոմոդեդովո» օդանավակայանում, սակայն ժամեր անց ազատ էր արձակվել։ Ադրբեջանական լրատվամիջոցների հաղորդմամբ՝ նա օդանակավակայում հայտարարել է, որ «հույս չի ունեցել թե կվերադառնա և պատրաստվել է վատթարագույնին»։

«Ես հույս չունեի վերադառնալ հայրենիք։ Իմ նկատմամբ հետախուզում են հայտարարել ԱՊՀ երկրներում, այժմ չեմ կարող այցելել այդ կազմակերպության անդամ երկրներ»,- ասել է նա՝ շնորհակալության հայտնելով Ադրբեջանի նախագահին, երկրի իրավապահ կառույցներին ու Մոսկվայում դեսպանատանն իրեն ազատելու համար։

Նշենք, որ Զեյնալիի փաստաբան Ալեքպեր Գարաևը նախօրեին հայտարարել էր, որ «ռուսական կողմը մարդասիրական վերաբերունք է ցուցաբերել»։

«Չնայած նրան, որ Հայաստանը Քյամիլի նկատմամբ հետախուզում է հայտարարել, և նրան ծանր հոդվածներով շատ լուրջ մեղադրանքներ են առաջադրվել՝ Ռուսաստանը մարդասիրություն դրսևորեց»,- ասել էր նա։

Ավելի վաղ ադրբեջանական լրատվամիջոցները հայտնել էին, որ ՀՀ-ում որ բլոգերին մեղադրանք է առաջադրված ՀՀ Քրեական օրենսգրքի 5 հոդվածով՝ 135 (Մարդկության դեմ հանցագործությունների), 137 (Հովանավորվող անձի դեմ ուղղված պատերազմական հանցագործությունների), 140 (Պատերազմ վարելու արգելված եղանակների կիրառմամբ պատերազմական հանցագործությունների), 147 (Վարձկանության) և 149 (Ագրեսիայի) հատկանիշներով։ 

ՀՀ ներքին գործերի նախարարի մամուլի խոսնակը Factor.am-ի հետ զրույցում ասել էր՝ «Այդ անձի նկատմամբ սպանության մեղադրանքով կա հայտարարված միջպետական հետախուզում»՝ զերծ մնալով այլ մանրամասներ հաղորդելուց։

Այսօր Մոսկվայում պետք է տեղի ունենար Զեյնալիի խափանման միջոցի հարցով դատական նիստը, որտեղ պետք է նաև դիտարկվեին հայկական կողմից ներկայացված փաստաթղթերը, սակայն ՌԴ-ն, չսպասելով դրան, հետախուզվողին ազատ է արձակել և հետ ուղարկել Բաքու։

Էմմա Չոբանյան