Քաղաքականություն
20.02.2024 | 11:51
Ֆրանսիայի դատարանը սառեցրել է Irina Maria վիլլայի սեփականության իրավունքը, որը գտնվում է Լազուր ափի Ռոքբրյուն-կապ-Մարտեն հանգստավայրում: Պաշտոնապես այն պատկանում է ռուսաստանաբնակ հայ գործարար Սամվել Կարապետյանին, սակայն Փարիզի դատախազները կարծում են, որ դրա իրական շահառուն ռուսական նավթագազային «Գազպրոմի» դուստր ձեռնարկությունն է, գրում է ֆրանսիական Le Monde-ը։
Վիլլան տեղակայված է 3 հեկտար հողատարածքի վրա: Բացի բազմահարկ գլխավոր շենքից՝ այն ներառում է նաև երեք լողավազան, թենիսի կորտ և ուղղաթիռի հարթակ։ Գույքի ընդհանուր արժեքը գնահատվում է 120 միլիոն եվրո։
Վիլլայի սեփականության իրավունքը, ինչպես նաև SNC Maritime Villa Holding-ի բաժնետոմսերը սառեցնելու հրամանը թվագրվում է 2024 թվականի փետրվարի 12-ով։
AFP-ն գրում է, որ կազմակերպված հանցավորության դեմ պայքարով զբաղվող Փարիզի դատախազության ստորաբաժանումը (Junalco) վիլլայի նկատմամբ հետաքննությունն է իրականացրել 2009 թվականի դեկտեմբերի 11-ից Փարիզում, Կիպրոսում, Ռուսաստանում և Ռոքբրյուն-կապ-Մարտինում կատարված փողերի լվացման դեպքերի առնչությամբ:
2016 թվականին «Գազպրոմ Նեֆտ»-ը՝ «Գազպրոմի» նավթային դուստր ձեռնարկությունը, վիլլան վաճառել է Սամվել Կարապետյանին։ Սակայն Junalco-ի նախաքննության ընթացքում բազմաթիվ փաստեր են բացահայտվել, որոնք վկայում են, որ վիլլան իրականում երբեք դուրս չի եկել «Գազպրոմ Նեֆտ»-ի վերահսկողությունից։
Փաստաթղթերը, որոնք ուսումնասիրել ու վերլուծել են լրագրողները, ցույց են տալիս, որ Սամվել Կարապետյանը «Գազպրոմ Նեֆտ»-ից գնել է Maritime Villa Holding SNC ընկերության բաժնետոմսերը «Գազպրոմբանկի» կողմից տրամադրված 115 միլիոն եվրոյի վարկի շնորհիվ։ Այն պատկանում է «Գազպրոմ»-ին և Ռուսաստանի նախագահ Վլադիմիր Պուտինի մտերիմ ընկերներից Յուրի Կովալչուկին։ Վարկը տրամադրել է ռուսական բանկը՝ վիլլայի գրավի դիմաց։
Սամվել Կարապետյանը «Տաշիր» ընկերությունների խմբի նախագահն է, որն աշխատում է անշարժ գույքի, շինարարության, էներգետիկայի ու ֆինանսների ոլորտում։ Forbes ամսագիրը նրա կարողությունը գնահատում է 2,7 միլիարդ դոլար։ Le Monde-ը նշում է, որ Կարապետյանը բիզնեսում իր հաջողության մեծ մասի համար պարտական է «Գազպրոմ»-ին: Ըստ պարբերականի՝ Սամվել Կարապետյանին և անշարժ գույքի մյուս բաժնետերերին միավորում է մի բան՝ բոլորը կապված են ռուսական պետական «Գազպրոմի» հետ»:
Էմմա Չոբանյան
