Բաքուն չի ընդունում ՀՀ ինքնիշխան տարածքների օկուպացիայի փաստը․ Ադրբեջանի ԱԳՆ-ի արձագանքը Նիկոլ Փաշինյանին

Ադրբեջանի ԱԳ նախարարությունն արձագանքել է այսօր Կառավարության նիստում ՀՀ վարչապետ Նիկոլ Փաշինյանի ելույթին, որի ընթացքում Փաշինյանը խոսել է Բաքվի կողմից ռազմական ագրեսիայի քաղաքականության և հայկական սուվերեն տարածքներն օկուպացիայի տակ պահելու մասին։

Մասնավորապես, Ադրբեջանի ԱԳՆ-ն հայտարարել է, թե, իբր, Փաշինյանի «անհիմն մեղադրանքները տարածաշրջանում լարվածություն ստեղծելու նպատակ ունեն»։ Բաքուն նաև հերքում է իր ագրեսիվ քաղաքականության բնույթը՝ ուղղված Հայաստանի դեմ։

«Անկլավների և էքսկլավային գյուղերի խնդրի վերաբերյալ Հայաստանի վարչապետը ևս մեկ անգամ նշում է, որ Ադրբեջանն օկուպացրել է 31 գյուղերի տարածքներ, ինչը քաղաքական շահարկումների մաս է։ Հիշեցնենք, որ Հայաստանը պարտավոր է Ադրբեջանին վերադարձնել ութ գյուղ։ Հայկական կողմը, վկայակոչելով 1991 թվականի սահմանների և Ալմա-Աթայի հռչակագրի հիման վրա տարածքային ամբողջականությունը և սահմանազատումը, վերջին 35 տարիների ընթացքում չի ենթարկվել այդ քարտեզներին և համաձայնագրերին, հրաժարվել է ճանաչել խորհրդային քարտեզներում արտացոլված սահմանները։ Հայաստանի՝ բոլոր հարևանների տարածքային ամբողջականությանը սատարող վարչապետին ցանկանում ենք հիշեցնել Ադրբեջանի տարածքային ամբողջականության դեմ շարունակվող պահանջները Հայաստանի Սահմանադրությամբ, գործող օրենսդրությամբ, պաշտոնական նամակներով, պաշտոնական հայտարարություններով, հրապարակված փաստաթղթերով, միջազգային կազմակերպություններ և դատարաններ հայցերով»,- ասվում է հայտարարության մեջ։

Նշենք, որ պաշտոնական Բաքուն իր վերջին շրջանի հայտարարություններով մշտապես դժգոհություն է հայտնում Ադրբեջանի դեմ ՀՀ-ի կողմից միջազգային տարբեր ատյաններում ներկայացվող հայցերի հետ կապված։ Չի բացառվում, որ սա պայմանավորված է նաև Բաքվի դեմ Միջազգային քրեական դատարանին ուղղված Երևանի հայցի նախապատրաստմամբ։

Էմմա Չոբանյան