15.07.2026 | 16:41
Ինչ ծավալի ապրանք է Ադրբեջանից Հայաստան ներկրվել այս տարվա վեց ամիսներին
Հրաժարականի արդյունքում կարգապահական հնարավոր տույժից խուսափած դատավորն ընտրվել է Վերաքննիչ դատարանի դատավորի թեկնածու
Հասարակություն
14.02.2024 | 14:20
Սնանկության դատարանի նախկին դատավոր Սամվել Թադևոսյանը, որն իր վերաբերյալ կարգապահական վարույթի քննությունից 5 օր առաջ հրաժարականի դիմում է ներկայացրել ու այսպիսով խուսափել հնարավոր տույժից, հավակնում է կրկին վերադառնալ դատական համակարգ։
Բարձրագույն դատական խորհուրդը նրան ընտրել է որպես Վերաքննիչ քաղաքացիական դատարանի դատավորի թեկնածու, ավելին՝ Թադևոսյանը գլխավորում է թեկնածուների ցուցակը։ Առավել ուշագրավ է, որ Սամվել Թադևոսյանի կարգապահական գործով ևս երեք դատավոր էր անցնում։ Կարգապահական գործի քննության արդյունքում նրանց բոլորի լիազորությունները ԲԴԽ-ն դադարեցրել է։ Ինչ վերաբերում է Սամվել Թադևոսյանին, նրա մասով վարույթը կարճվել է՝ հաշվի առնելով այն հանգամանքը, որ Թադևոսյանն այլևս դատավոր չի եղել։
Հիշեցնենք, որ Բարձրագույն դատական խորհուրդը 2023 թվականի հունիսի 19-ին սկսել է ՄԻԵԴ Վճռի հիմքով դատավորներ Աստղիկ Խառատյանի, Տիգրան Պետրոսյանի, Արտակ Բարսեղյանի և Սամվել Թադևոսյանի նկատմամբ հարուցված կարգապահական գործի քննությունը։ Դատավորների նկատմամբ կարգապահական վարույթը հարուցվել էր, քանի որ Մարդու իրավունքների եվրոպական դատարանը «Շոլց ԱԳ» ընկերությունն ընդդեմ Հայաստանի» գործով արձանագրել էր, որ Հայաստանի Հանրապետությունը խախտել է դիմումատու ընկներության՝ դատարանի մատչելիության իրավունքը։ Մասնավորապես, ըստ ՄԻԵԴ-ի քաղաքացիական դատարանի քննությանը ենթակա գործը այս դատարանի և ոչ մի ատյանի դատավոր վարույթ չի ընդունել։
Կարգապահական գործի քննությունից 5 օր առաջ Սամվել Թադևոսյանը ԲԴԽ-ին հրաժարականի դիմում է ներկայացրել, և խորհուրդը դադարեցրել է նրա լիազորությունները։
Թե ԲԴԽ անդամներից ով ինչպես է քվեարկել Սամվել Թադևոսյանի ընտրությանը, մեզ հայտնի չէ․ օրենքով դռնփակ նիստում է իրականացվում քվեարկությունը և միայն դրա վերջնարդյունքն է հասանելի դառնում հանրությանը։
Թադևոսյանի ընտրության վերաբերյալ մեկնաբանություն ենք խնդրել նաև ԲԴԽ-ից, որը ստանալուն պես կհրապարակենք։
Արաքս Մամուլյան
