Հայաստան Պուտինի այցի հարցը կլուծվի երկխոսությամբ․ Պեսկովը՝ ՄՔԴ-ին Երևանի միանալու մասին
Քաղաքականություն
12.02.2024 | 14:52![](https://factor.am/wp-content/uploads/2021/10/Պեսկով.jpg)
Ռուսաստանը պետք է երաշխիքներ ստանա Հայաստանից՝ կապված Միջազգային քրեական դատարանի (ՄՔԴ) կանոնադրությանը միանալու հետ, այդ հարցը կլուծվի երկրների միջև երկխոսության ընթացքում։ Այս մասին լրագրողների հետ զրույցում ասել է ՌԴ նախագահի մամուլի քարտուղար Դմիտրի Պեսկովը՝ պատասխանելով երկրի նախագահ Վլադիմիր Պուտինի՝ Հայաստան հնարավոր այցի մասին մասին հարցին, գրում է ՏԱՍՍ-ը։
«Մենք արդեն ասել ենք, որ նոր իրականությունը՝ կապված այդ միջազգային կառույցին Հայաստանի միանալու հետ, չի կարող բացասական հետևանքներ չունենալ մեր երկկողմ հարաբերությունների վրա։ Իհարկե, այստեղ շատ կարևոր է մեր հայ գործընկերներից որոշակի հավաստիացումներ ստանալը, այդ հարցը դեռ պետք է լուծել երկկողմ երկխոսության շրջանակում, որին մենք միտված ենք»,- ասել է Պեսկովը։
Նշենք, որ նախօրեին բրիտանական The Telegraph-ին տված հարցազրույցում ՀՀ վարչապետ Նիկոլ Փաշինյանը պատասխանելով հարցին, թե Հայաստան ժամանելու դեպքում Պուտինը կձերբակալվի՞՝ ըստ ՄՔԴ որոշման, նշել էր, որ Հայաստանում դրա համար իրավական ինստիտուտներ են գործում, և ինքը չի որոշում՝ ում ձերբակալել։ Նա նաև ասել է, որ պետության գործող ղեկավարներն իրենց կարգավիճակի բերումով ունեն անհաղթահարելի անձեռնմխելիություն, դա քաղաքական հարց չէ, որ ինքը պետք է քննարկի։
Էմմա Չոբանյան