15.09.2026 | 18:30
«Դաշնակցական բոլշևիզմ»-ից մինչև «ՀՀՇ-ի ծիլեր». գաղափարախոսական պարադոքս՝ ԱԺ-ում. ՏԵՍԱՆՅՈՒԹ
Փառքի անկյուններում՝ ոճային առումով արդիականացման աշխատանքներ են իրականացվում․ ՊՆ պարզաբանումը
12.02.2024 | 11:43
Վերջին երկու օրերին որոշ լրատվամիջոցներ և սոցիալական ցանցերի օգտատերեր խեղաթյուրված, կեղծ տեղեկություններ են տարածում, թե, իբր, ՊՆ զորամասերում Փառքի անկյուններն ապամոնտաժվում են, իսկ սխրագործ զինծառայողների լուսանկարները՝ հանվում, և դրանք այլևս չեն զետեղվելու․ տեղեկացնում են ՀՀ ՊՆ-ից։
«Այս կապակցությամբ պաշտպանության նախարարությունը հայտնում է, որ զինված ուժերի գլխավոր շտաբի համապատասխան կառուցվածքային ստորաբաժանումը բոլոր զորամասերի տեղեկատվության և ժամանցի սենյակներում իրականացնում է վերանորոգման աշխատանքներ, այդ թվում նաև տպագրական նյութերի, քանի որ ժամանակի ընթացքում դրանք մաշվում են:
Իրականացվում են տպագրական նյութերի թարմացման, վերանորոգման, թեմատիկ առումով համալրման մի շարք աշխատանքներ, իսկ Փառքի անկյուններում՝ ոճային առումով արդիականացման աշխատանքներ»,- ասված է հաղորդագրությունում։
Հիշեցնենք, որ Factor.am-ը ահազանգեր էր ստացել, որ Կենտրոնական կլինիկական զինվորական (Մուրացան) հոսպիտալի ադմինիստրացիայի 2-րդ հարկից հեռացվել են Արցախյան պատերազմում նահատակված զինվորների լուսանկարները։ Փորձել էինք կապ հաստատել ՊՆ մամուլի քարտուղար Արամ Թորոսյանի հետ, սակայն ապարդյուն։ Զանգահարել էինք Մուրացանի զինվորական հոսպիտալի տնօրենի ընդունարան, որտեղից մեզ պատասխանել էին. «Եթե ինչ-որ հարցեր ունեք, մոտեցեք ստեղ, մենք քաղաքային հեռախոսով ոչ մի բան չենք պատասխանում»։ Այցելել էինք Մուրացանի զինվորական հոսպիտալ, սակայն մեզ թույլ չէին տվել ներս մտել՝ պատճառաբանելով, որ նախարարությունից թույլտվություն է անհրաժեշտ:
