Բաքուն Երևանին մեղադրում է ականապատ դաշտերի «անօգուտ» ու «ոչ ճշգրիտ» տեղեկամատյաններ փոխանցելու մեջ

Հայաստանը Ադրբեջանին  ականապատ դաշտերի 8 տեղեկամատյաններ է փոխանցել։ Ադրբեջանական լրատվամիջոցների փոխանցմամբ՝ այս մասին հայտարարել է Ադրբեջանի ականազերծման գործակալությունը (ANAMA): Ըստ աղբյուրի՝ քարտեզները հիմնականում առնչվում են Քարավաճառի Մռավի լեռնաշղթայի երկայքով «ականապատ հատվածներին»։ Բաքուն պնդում է, որ դրանք «չեն համընկնում ականների իրական տեղակայման հետ, կոորդինատները սխալ են և անօգուտ»։

Ավելի վաղ ՀՀ ԱԱԾ հայտարարություն էր տարածել, որ ՀՀ-ն, հումանիտար նկատառումներից ելնելով, Ադրբեջանին կփոխանցի ականապատ դաշտերի քարտեզների վերաբերյալ 8 տեղեկամատյաններ։ Նշվում էր, որ այդ տեղեկամատյանները աշխատանքային խողովակներով կփոխանցվեն ադրբեջանական կողմին: Դրանց կրկնօրինակները կփոխանցվեն միջազգային գործընկերներին։

ՀՀ-ն Ադրբեջանին կփոխանցի ականապատ դաշտերի քարտեզների վերաբերյալ 8 տեղեկամատյաններ․ ԱԱԾ

Ադրբեջանի ԱԳՆ-ն այնուհետև հայտարարություն էր տարածել ու Հայաստանի հասցեին կրկին անհիմն մեղադրանքներ հնչեցրել։

«Մենք բազմիցս նշել ենք, որ ներկայացված քարտեզներն անօգուտ են, թերի և չեն արտացոլում իրական իրավիճակը։ Թեև այս քարտեզները ցույց են տալիս, որ մեր տարածքներում թաղված է 400 հազար ական, իրականում ականների թիվը գերազանցում է 1 միլիոնը։ Հայկական կողմի այս հայտարարությունը ցույց է տալիս, որ այդ երկրի նպատակը մարդասիրական գործընթացին նպաստելը չէ, և այդ քայլը չի ​​կարող դիտարկվել որպես վստահության ամրապնդման միջոց»,-ասվում էր հայտարարությունում։

ՀՀ ԱԳՆ-ն էլ իր հերթին արձագանքել էր Բաքվին․

«Ինչպես բազմիցս նշվել է, Հայաստանը, որպես վստահության ամրապնդման միջոց, Ադրբեջանին է փոխանցել իր տրամադրության տակ եղած ականապատ դաշտերի բոլոր քարտեզները, որոնք ստացել է Լեռնային Ղարաբաղի պաշտոնյաներից։ Ավելի ուշ, առաջնորդվելով մարդասիրական նպատակներով, Հայաստանը Լեռնային Ղարաբաղի նախկին պաշտոնյաների շրջանում հարցումների հիման վրա նոր քարտեզներ է պատրաստել՝ քարտեզները Ադրբեջանին փոխանցել համար: Ցավոք, այս նախաձեռնությունն ադրբեջանական կողմից անմիջապես խիստ բացասական և հեգնական արձագանք ստացավ, որը մերժում է վստահության ամրապնդմանն ուղղված Հայաստանի ջանքերը, շարունակում է շահարկել թեման և Հայաստանի դրական քայլը դարձնում էսկալացիայի և բացասական հռետորաբանության առիթ»,- նշված էր  է ԱԳՆ-ի X-ի միկրոբլոգում գրառման մեջ։

Հայաստանի դրական քայլը դարձվում է էսկալացիայի և բացասական հռետորաբանության առիթ․ ՀՀ ԱԳՆ

Հիշեցնենք, որ ՄԱԿ-ի Արդարադատության դատարանը 2023 թ-ի փետրվարին միաձայն քվեարկությամբ ամբողջությամբ մերժել էր Ադրբեջանի կողմից հրատապ միջոցներ ձեռնարկելու վերաբերյալ միջնորդությունը՝ հերքելով Հայաստանի կողմից Լեռնային Ղարաբաղում և հարակից տարածքներում ականներ տեղադրելու կեղծ մեղադրանքները։ Դատարանը հայտարարել էր, որ Ադրբեջանը չի ներկայացրել ապացույցներ, որոնք ցույց են տալիս, որ ականների հետ կապված Հայաստանի ենթադրյալ վարքագիծը «նպատակ ունի խաթարել էթնիկ ադրբեջանցիների իրավունքները»։

Էմմա Չոբանյան