Քաղաքականություն
09.02.2024 | 18:38
Այսօր Սահմանադրական դատարանի հիմնադրման 28-ամյակին նվիրված միջոցառում է տեղի ունեցել բարձր դատարանում։ Միջոցառմանը ներկա են եղել ՀՀ վարչապետ Նիկոլ Փաշինյանը, ՀՀ նախագահ Վահագն Խաչատուրյանը, Գլխավոր դատախազ Աննա Վարդապետյանը, ՔԿ նախագահ Արգիշտի Քյարամյանը։
Factor.am-ը կառավարության հրապարակած կադրերում արձանագրել է, որ միջոցառմանը չի մասնակցում ԱԺ նախագահ Ալեն Սիմոնյանը։ Հիշեցնենք, որ Հայաստանը խորհրդարանական կառավարման մոդելով պետություն է։
Factor.am-ն ԱԺ նախագահի խոսնակից հետաքրքրվեց՝ ինչո՞ւ Ալեն Սիմոնյանը չի մասնակցել միջոցառմանը։ Վերջինս խոստացավ ավելի ուշ մեկնաբանել, սակայն այդպես էլ արձագանք չեղավ։
Մեզ հայտնի դարձավ, որ Ալեն Սիմոնյանն ավելի վաղ հաստատել էր մասնակցությունը, սակայն, ինչպես այսօր պարզվեց, որոշել է չմասնակցել։
Ալեն Սիմոնյանի բացակայությունն առավել ուշագրավ է վերջին իրադարձությունների ֆոնին։
Հիշեցնենք՝ իրավապահները Էկոնոմիկայի նախարարությունում չարաշահումների գործով 7 անձ էր ձերբակալել, որոնց թվում է Ալեն Սիմոնյանի եղբոր կինը՝ Անի Գևորգյանը։
Այս իրադարձություններից հետո տեղեկություններ շրջանառվեցին, որ Փաշինյանի ու Սիմոնյանի հարաբերությունները լարված են, ինչը ՔՊ-ականները հերքում են։
ԱԺ նախագահի խոսնակը Factor.am-ին ավելի ուշ փոխանցեց, որ Ալեն Սիմոնյանը միջոցառմանը չի մասնակցել զբաղվածությամբ պայմանավորված։
Նարեկ Կիրակոսյան
