15.12.2025 | 23:44
Ադրբեջանը պետք է դադարեցնի անձանց հսկողության MIRAS համակարգի ներդրումը. HRW
Հայ-ադրբեջանական կարգավորման հարցում Մոսկվայի դերն այլընտրանք չունի. ՌԴ ԱԳ փոխնախարար
Քաղաքականություն
08.02.2024 | 17:28
ՌԴ ԱԳ փոխնախարար Միխայիլ Գալուզինը հայտարարել է, որ Մոսկվայի նպատակն է հայ-ադրբեջանական հարաբերությունների կարգավորման հարցում աջակցել Հայաստանին ու Ադրբեջանին հաշտեցման և խաղաղ փոխգործակցության կայուն ուղի գտնելու հարցում։
«Ռուսաստանի դերը հայ-ադրբեջանական կարգավորման հարցում այլընտրանք չունի, այս դերը մեծ է և եզակի։ Առաջին հերթին՝ ՌԴ նախագահ Վլադիմիր Պուտինի դերը։ Այսօրվա մեր խնդիրն է օգնել մեր գործընկերներին՝ Հայաստանին և Ադրբեջանին, հասնել հաշտեցման և խաղաղ փոխգործակցության կայուն ճանապարհին։ Որպեսզի իրավիճակը տարածաշրջանում լինի կայուն ու հանգիստ»,- ասել է Գալուզինը «Россия 24» հեռուստաալիքին տված հարցազրույցում, փոխանցում է Ինտերֆաքսը։
Նա նշել է, որ ՌԴ-ն Բաքվին ու Երևանին խորհրդատվական ծառայություններ է առաջարկում հայ-ադրբեջանական սահմանի սահմանազատման շրջանակում, քանի որ Մոսկվան ունի բացառիկ տեղագրական նյութեր։
«Ինչ վերաբերում է խաղաղության գործընթացին, խաղաղության պայմանագրի ստորագրմանը, ապա այստեղ ՌԴ-ն շարունակում է ակտիվ օգնել հարցերի քննարկմանը։ Մենք միշտ պատրաստ ենք մեր հարթակը տրամադրել հայ-ադրբեջանական խաղաղության պայմանագրի շուրջ բանակցությունների համար։ Հուսով ենք, որ Երևանում կգերակայի այն ըմբռնումը, որ եռակողմ պայմանավորվածությունների իրականացումը հայ-ադրբեջանական հարաբերությունների կարգավորման ամենավստահելի ուղին է, այլ ոչ թե արտատարածաշրջանային խաղացողներին, առաջին հերթին՝ ԱՄՆ-ին և Եվրամիությանը ներգրավելու ջանքերը, որոնց գործունեությունն ուղղված է ոչ թե կարգավորմանը նպաստելուն, այլ նրան, որ ՌԴ-ն դուրս մղվի այդ գործընթացից, կոտրվի Հարավային Կովկասում ստեղծված ուժերի հավարասարակշռությունը և այդպիսով ևս մեկ անհանգստության օջախ լինի ՌԴ-ի հարևանությամբ»,- հայտարարել է ՌԴ ԱԳ փոխնախարարը։
