Ադրբեջանում, ընտրություններով պայմանավորված, սահմանափակել են համացանցի հասանելիությունը․ լրագրողների ահազանգը

Ադրբեջանում արտահերթ նախագահական ընտրությունների պատճառով երկրի տարածքում, հատկապես՝ որոշ ընտրատեղամասերում, համացանցի հասանելիության սահմանափակումներ կան։ Ընտրատեղամասերում աշխատող անկախ ու ընդդիմադիր լրագրողները պնդում են, որ խնդիրների առաջ են կանգնած։ Նրանք նշում են, որ WhatsApp-ով ու այլ հավելվածներով հնարավոր չէ ոչ միայն ընտրատեղամասերից, ոչ էլ ավելի հեռվից տեսագրություններ, նույնիսկ ձայնային հաղորդագրություններ ուղարկել։

Վարանդայում աշխատող Meydan TV-ի աշխատակիցն ասում է, որ փետրվարի 6-ից այնտեղ ինտերնետի սահմանափակումներ կան։ Բացի այդ, կապը շատ թույլ է։

Կենտրոնական ընտրական հանձնաժողովի հասարակայնության հետ կապերի բաժնի ղեկավար Շահին Ասադլին Meydan TV-ին ասել է, որ որևէ բողոք չի ստացել ինտերնետ ծառայության միջամտության վերաբերյալ։

«Եթե կան ապացույցներ, ապա սա պետք է դիտարկել որպես տեղեկատվության հասանելիության և փոխանակման իրավունքի միտումնավոր սահմանափակում, և սա անընդունելի է։ Եթե ​​նման իրավիճակ լինի, լրագրողները կարող են ավելի ուշ դրա վերաբերյալ դատական ​​վեճ բացել»,- ասել է փաստաբան Ալասգար Մամեդլին։

Մինչ այդ էլ, անկախ լրագրողներն ու որոշ դիտորդներ շարունակում են ահազանգել ընտրախախտումների մասին, հատկապես, այսպես կոչված «կարուսելների», թե ինչպես է մեկ անձը քվեարկում մի քանի ընտրատեղամասերում։

Հիշեցնենք՝ այսօր Ադրբեջանում արտահերթ նախագահական ընտրություններ են անցկացվում։ Գործող նախագահ Իլհամ Ալիևից զատ՝ ընտրություններին մասնակցում է ևս 6 թեկնածու՝ Մեջլիսի պատգամավոր և Սոցիալական հետազոտությունների կենտրոնի խորհրդի նախագահ Զահիդ Օրուջը, պատգամավոր Ռազի Նուրուլլաևիը, մեկ այլ պատգամավոր՝ «Համայն Ադրբեջանի ժողովրդական ճակատ» կուսակցության ղեկավար Գուդրաթ Հասանգուլիևը «Մեծ արարում» կուսակցության ղեկավար և խորհրդարանի պատգամավոր Ֆազաիլ Մուստաֆան, Ադրբեջանի Լիբերալ-դեմոկրատական ​​կուսակցության նախկին ղեկավար Ֆուադ Ալիևը, «Մեծ Ադրբեջան» կուսակցության նախագահ Էլշադ Մուսաևը։ Նրանք, սակայն, իրականում գործող իշխանությունների աջակիցներն են։

Էմմա Չոբանյան