Ադրբեջանում մեկնարկել են նախագահական ընտրությունները. Ալիևները քվեարկել են հայաթափված Ստեփանակերտում

Ադրբեջանում առավոտյան ժամը 08։00-ից մեկնարկել է արտահերթ նախագահական ընտրությունների քվեարկությունը, որը տևելու է մինչև ժամը 19։00-ն։ Կենտրոնական ընտրական հանձնաժողովի հաղորդմամբ՝ ցուցակներում ընդգրկված է 6 միլիոն 478 հազար 623 ընտրող։ Նրանք կարող են քվեարկել 6537 ընտրատեղամասերում, որոնցից 49-ը տեղակայված է 37 երկրներում։

Ընտրություններին, ըստ նախնական տվյալների, հետևելու է ավելի քան 90 հազար դիտորդ, որից 790-ը՝ միջազգային։ ԵԱՀԿ/ԺՀՄԻԳ-ը մասնակցում է 266 դիտորդով։ ԵԽԽՎ-ն ու Եվրախորհրդարանը չեն հրավիրվել ընտրությունները դիտարկելու։

Նշենք, որ Ադրբեջանն ընտրական շոու է կազմակերպել հայաթափված Արցախում։ Թեպետ այստեղ բնակչություն չկա, սակայն բացվել է 23 ընտրատեսամաս։ Բաքուն այստեղ 23,000 ընտրողի է ներառել ցուցակներում։ Ադրբեջանի իշխանությունները Ստեփանակերտում Արցախի նախագահի նստավայրը ևս վերածել են ընտրատեղամասի, որտեղ էլ այսօր քվեարկել են Իլհամ Ալիևն ու նրա ընտանիքի անդամները։

Նշենք, որ Ալիևից զատ՝ ընտրություններին մասնակցում է ևս 6 թեկնածու՝ Մեջլիսի պատգամավոր և Սոցիալական հետազոտությունների կենտրոնի խորհրդի նախագահ Զահիդ Օրուջը, պատգամավոր Ռազի Նուրուլլաևիը, մեկ այլ պատգամավոր՝ «Համայն Ադրբեջանի ժողովրդական ճակատ» կուսակցության ղեկավար Գուդրաթ Հասանգուլիևը, «Մեծ արարում» կուսակցության ղեկավար և խորհրդարանի պատգամավոր Ֆազաիլ Մուստաֆան, Ադրբեջանի Լիբերալ-դեմոկրատական ​​կուսակցության նախկին ղեկավար Ֆուադ Ալիևը, «Մեծ Ադրբեջան» կուսակցության նախագահ Էլշադ Մուսաևը։ Իրականում, սակայն, այս թեկնածուներն Ալիևի ու նրա իշխանության աջակիցներն են։

Էմմա Չոբանյան