15.07.2026 | 20:20
«Դրսից եկողների» դեմ փոփոխություն․ ՀՀ-ն խստացնում է ընտրական ցենզը, մինչ այլ երկրներ հրաժարվում են սահմանափակումներից
Միջազգային քրեական դատարանում ՀՀ անդամակցության առիթով հանդիսավոր արարողություն տեղի կունենա
Քաղաքականություն
06.02.2024 | 17:40
2024 թվականի փետրվարի 8-ին Միջազգային քրեական դատարանի Հաագայի (Նիդերլանդներ) նստավայրում տեղի կունենա հանդիսավոր արարողություն՝ Հայաստանի Հանրապետությանը որպես Հռոմի Ստատուտի՝ ՄՔԴ հիմնադիր պայմանագրի 124-րդ պետության ողջունելու առիթով։ Այս մասին հայտնում է ՄՔԴ-ն։
Հաղորդվում է, որ արարողությանը մասնակցելու են Հայաստանի կառավարության բարձրաստիճան պաշտոնյաներ, ՄՔԴ-ի, Trust Fund for Victims կազմակերպության և անդամ պետությունների ներկայացուցիչներ։
Նշենք, որ փետրվարին 1-ին ՀՀ-ն պաշտոնապես միացել է ՄՔԴ-ին։ Ավելի վաղ էլ ՄԱԿ-ի Իրավական հարցերի գրասենյակի Պայմանագրային բաժնում տեղի ունեցած արարողության ժամանակ ի պահ էր հանձնվել Հայաստանի կողմից Միջազգային քրեական դատարանի Հռոմի ստատուտի վավերացման փաստաթուղթը։
ՀՀ նախագահ Վահագն Խաչատուրյանը հոկտեմբերի 13-ին ստորագրել էր 1998 թվականի հուլիսի 17-ին ստորագրված Միջազգային քրեական դատարանի Հռոմի կանոնադրությունը վավերացնելու և կանոնադրության 12-րդ հոդվածի 3-րդ մասի հիմքով «Հայաստանի Հանրապետության կողմից միջազգային քրեական դատարանի իրավազորությունը հետադարձորեն ճանաչելու մասին» հայտարարություն ընդունելու մասին օրենքը: Ազգային ժողովը հոկտեմբերի 3-ին ձայների 60 կողմ, 22 դեմ հարաբերակցությամբ ընդունել էր Միջազգային քրեական դատարանի Կանոնադրությունը վավերացնելու և հետադարձ ուժով իրավազորությունը ճանաչելու մասին հայտարարության օրենքի նախագիծը:
Էմմա Չոբանյան
