15.05.2026 | 23:20
Հուլիսի 1-ից Երևան-Բուխարեստ նոր ուղիղ չվերթ կմեկնարկի
Ավինյանը ցավակցական գրառում է արել․ նա չի այցելել Նոր Արեշում տեղի ունեցած պայթյունի վայր
05.02.2024 | 17:31
Երևանի քաղաքապետ Տիգրան Ավինյանը ֆեյսբուքյան գրառմամբ է անդրադարձել այսօր Նոր Արեշում տեղի ունեցած պայթյունին։
«Ցավով տեղեկացա այսօր մայրաքաղաքի Էրեբունի վարչական շրջանում տեղի ունեցած ողբերգակական դեպքի մասին, որը նաև, ինչպես պարզ դարձավ, մարդկային կյանքեր է խլել: Հուսով եմ, որ հետաքննությունը կտա բոլոր հարցերի պատասխանները: Խորին ցավակցությունս եմ հայտնում զոհվածների հարազատներին և միաժամանակ շուտափույթ ապաքինում մաղթում վիրավորներին»,- գրել է Ավինյանը։
Քաղաքապետը վստահեցրել է, որ «համայնքն իր լիազորությունների շրջանակում լինելու է տուժած ընտանիքների կողքին»։
Նկատենք, որ Տիգրան Ավինյանը չի այցելել դեպքի վայր։ Առավոտյան Նոր Արեշի 34-րդ փողոցում էր փոխքաղաքապետ Սարգիս Մադաթյանը։ Այնտեղ էին նաև ավագանու անդամներ, վարչական շրջանների ղեկավարներ և նրանց տեղակալները։
Հիշեցնենք, որ 16 մարդու կյանք խլած «Սուրմուլու» առևտրի կենտրոնում տեղի ունեցած պայթյունից երեք օր անց Տիգրան Ավինյանն այցելել էր դեպքի վայր և Factor TV-ի հարցին ի պատասխան հաստատել, որ այդտեղ է որպես ՔՊ կուսակցության քաղաքապետի թեկնածու։ Նախկին փոխվարչապետ Ավինյանն այդ ժամանակ որևէ պաշտոն չէր զբաղեցնում։ Ողբերգական դեպքից և իր այդ հայտարարությունից շուրջ մեկ ամիս անց նա ընտրվեց Երևանի փոխքաղաքապետ։
Տիգրան Ավինյանի խոսնակ Հայկ Կոստանյանը Factor TV-ի հարցին ի պատասխան հաստատեց, որ Ավինյանը չի այցելել դեպքի վայր, սակայն հանձնանարել է, որ իրականացնեն կարիքի գնահատում և աջակցեն տուժած քաղաքացիներին։ Կոստանյանը նաև ընդգծեց, որ քաղաքապետարանից պաշտոնյաներ եղել են դեպքի վայրում։
Արփի Հակոբյան
