19.12.2025 | 03:00
Կոնֆերենցիաների լիգա. «Նոայի» հավանական մրցակիցները փլեյ-օֆֆում
Կարեն Անդրեասյանի սանիկ Քրիստինե Մկոյանին ու ևս երեք դատավորի նկատողություն հայտարարվեց. Արշակ Վարդանյանը հատուկ կարծիք ունի․ ՏԵՍԱՆՅՈՒԹ
Հասարակություն
05.02.2024 | 10:57
Բարձրագույն դատական խորհուրդը քիչ առաջ հրապարակեց որոշում, որով նկատողություն հայտարարվեց ԲԴԽ անդամ, Վճռաբեկ դատարանի վարչական պալատի դատավոր Քրիստինե Մկոյանին, նույն դատարանի դատավորներ Հովսեփ Բեդևյանին, Ռուզաննա Հակոբյանին և վարչական դատարանի դատավոր Արգիշտի Ղազարյանին:
Որոշմանը դեմ է խորհրդի անդամներից միայն Արշակ Վարդանյանը, նա հատուկ կարծիք ունի:
Հիշեցնենք, որ դատավորների նկատմամբ կարգապահական վարույթը հարուցվել է ՄԻԵԴ վճռի հիմքով: Եվրոպական դատարանն արձանագրել է, որ 2008 թվականին վարչական դատարանը, վարույթ չընդունելով «Դարեսկիզբ ՍՊԸ»-ի (Հայկական ժամանակ) հայցը, որով վիճարկվում էր Հայաստանում արտակարգ դրություն հայտարարելու մասին նախագահի հրամանագիրը, խախտել է դատարանի մատչելության իրավունքը:
Քրիստինե Մկոյանը նաև ԲԴԽ անդամ է: Բարձրագույն դատական խորհուրդը 2023 թվականի հուլիսին ՄԻԵԴ վճռի հիմքով դադարեցրել է 3 դատավորի՝ Աստղիկ Խառատյանի, Արտակ Բարսեղյանի և Տիգրան Պետրոսյանի լիազորությունները։ Այս դեպքում ևս դատավորների նկատմամբ վարույթը հարուցվել էր, քանի որ ՄԻԵԴ-ն արձանագրել էր, որ Հայաստանը խախտել է դատարանի մատչելության իրավունքը: Այս դեպքում էլ քաղաքացիական դատարանի քննության ենթակա գործն ակնհայտորեն որևէ ատյանի դատարանում վարույթ չէր ընդունվել: ՄԻԵԴ-ի այս վճռի հիմքով 4 դատավորի լիազորությունները դադարեցնելուն կողմ է քվեարկել նաև ինքը` դատավոր Քրիստինե Մկոյանը, այսինքն` նա իր որոշմամբ դիրքորոշում է հայտնել, որ այս արարքի համար պետք է դադարեցնել դատավորնորի լիազորությունները:
Դատավորների ընդհանուր ժողովի օրը՝ փետրվարի 2-ին, Factor.am-ը Մկոյանից հետաքրքվել էր՝ արդյո՞ք չի ստացվում, որ ԲԴԽ-ն այժմ էլ պետք է իր լիազորությունները դադարեցնի, ինչին ի պատասխան նա ասել էր, որ որ ԲԴԽ-ի փոխարեն չի կարող պատասխանել:
Արդարադատության նախարարության ներկայացուցիչ Արտյոմ Սուջյանից ևս հետաքրքրվեցինք՝ արդյո՞ք այս դեպքում ևս չպետք է դադարեցվեին դատավորների լիազորությունները՝ հաշվի առնելով ԲԴԽ-ի ձևավորած պրակտիկան, ինչին ի պատասխան Սուջյանն ասաց,որ ինքը դեռևս ծանոթ չէ ԲԴԽ-ի որոշմանը՝ դիրքորոշում հայտնելու համար, բայց մեր կողմից մատնանշված գործն ու Քրիստինե Մկոյանի և մյուսների վերաբերյալ գործի հանգամանքերը տարբերվում են միմյանցից։
Արաքս Մամուլյան
