ԱՄՆ Սենատը համաձայնեցրել է Ուկրաինային օգնելու օրինագիծը. Բայդենը Կոնգրեսին խնդրում է արագ ընդունել այն

Ամերիկացի սենատորները համաձայնության են եկել երկար սպասված երկկուսակցական օրինագծի շուրջ՝ ընդհանուր 118 միլիարդ դոլարի լրացուցիչ ֆինանսավորման համար, որը կուղղվի Ուկրաինային, Իսրայելին օգնության, ինչպես նաև Միացյալ Նահանգների հարավային սահմանների ամրապնդմանը, գրում է BBC-ի ռուսական ծառայությունը:

ԱՄՆ նախագահ Ջո Բայդենը պաշտպանել է օրինագիծը և Կոնգրեսին խնդրել է չհետաձգել դրա ընդունումը։ Նախնական քվեարկությունը սպասվում է շաբաթվա կեսին, սակայն արդեն պարզ է, որ օրինագիծը զգալի հակազդեցության կհանդիպի Ներկայացուցիչների պալատում, որտեղ մեծամասնություն են հանրապետականները։ Ներկայացուցիչների պալատի խոսնակ Մայք Ջոնսոնն արդեն ասել է, որ խոստանում է արգելափակել այն:

Սենատորները չեն կարողանում համաձայնության գալ անցյալ տարվա աշնանից: Հիմնական պատճառը հանրապետականների և դեմոկրատների միջև տարաձայնություններն են Մեքսիկայի հետ սահմանի ամրապնդման և ներգաղթային քաղաքականության խստացման միջոցառումների շուրջ։ Հանրապետականները պահանջում են խստացնել Մեքսիկայի հետ սահմանի հսկողությունը և այս պահանջը դարձրել են պայման Ուկրաինային ցանկացած լրացուցիչ օգնություն քննարկելու համար։
Լրացուցիչ ֆինանսավորման ընդհանուր գումարը կազմում է ավելի քան 118 մլրդ դոլար։

Սենատորներն առաջարկում են 60,06 մլրդ դոլար հատկացնել Ուկրաինային, 14,1 մլրդ՝ Իսրայելին, 20,23 մլրդ՝ Մեքսիկայի հետ սահմանի անվտանգությունն ապահովելուն, 4,83 մլրդ՝ Հնդկախաղաղօվկիանոսյան տարածաշրջանում ԱՄՆ գործընկերներին: