Ճանապարհամերձ խաչերն ապամոնտաժելու հրահանգ չկա. համայնքի ղեկավարները հերքում են

ՀՀ տարածքային կառավարման և ենթակառուցվածքների նախարարությունը հերքում է վերջին օրերին որոշ լրատվամիջոցներում և տելեգրամյան ալիքներում շրջանառվող տեղեկություններն այն մասին, թե մարզպետարանները համայնքի ղեկավարներին հրահանգել են ապամոնտաժել միջպետական և համայնքային ճանապարհներին տեղադրված խաչերը: Նախարարի մամուլի խոսնակ Սոնա Հարությունյանի պնդմամբ՝ նման հանձնարարական չի տրվել:

«Նման գործընթաց որևէ համայնքում չկա, դա ապատեղեկատվություն է: Նախարարը նման հարցով որևէ մարզպետի և համայնքի ղեկավարի հրահանգ չի տվել»,-Factor TV-ի հետ զրույցում հավաստիացրեց մամուլի խոսնակը:

Վերջին տարիներին հանրապետության միջպետական և համայնքային ճանապարհներին մեկը մյուսի հետևից տեղադրվեցին մի քանի մետրանոց խաչեր, որոնք նաև գիշերային ժամերին են լուսավորվում։ Այսօր գրեթե համայնք չկա, որտեղ նման խաչեր չլինեն: Հայաստանում առաջին անգամ այդպիսի խաչ տեղադրվել է դեռ 12 տարի առաջ:

2012 թվականին Երևան-Ապարան ճանապարհի «Տառ քարերի» պուրակի բարձրադիր մասում նախկին գլխավոր դատախազ Աղվան Հովսեփյանի նախաձեռնությամբ տեղադրվեց 33 մետրանոց «Սուրբ խաչը»:

Հետագայում Արագածոտնի մարզի համայնքային ճանապարհներին միմյանց հետևից տեղադրվեցին մասշտաբով ավելի փոքր խաչեր, իսկ 44-օրյա պատերազմից հետո ճանապարհամերձ խաչերի տեղադրումը համատարած դարձավ։ Թթուջուրի վարչական ղեկավար Զոհրակ Ասլանյանի խոսքով՝ իրենք, ի տարբերություն հարևան համայնքների, խաչը գյուղամիջում են կանգնեցրել:

Համայնքի ղեկավարը ևս վստահեցրեց, որ իրենց խաչն ապամոնտաժելու հրահանգ մարզպետարանի կողմից չի տրվել: Զոհրակ Ասլանյանը նշեց, որ խաչ տեղադրելու հարցում համայնքապետարանը որոշում չունի, նախաձեռնությունը գյուղացիներինն է: Երկմտում է խաչը քանդելու հարցում: Նա դժվարացավ ասել, եթե խաչն ապամոնտաժելու հանձնարարական լինի, կքանդի, թե՝ ոչ:

«Ես ոնց խաչը կքանդեմ, չեմ կարա: Խաչ ենք սարքել, քրիստոնյա ազգ ենք, ո՞նց քանդենք: Դժվար՝ ինչ-որ մեկը նման որոշում ընդունի»,- կարծիք հայտնեց համայնքի ղեկավարը: Արարատի մարզպետարանից ևս հերքեցին, թե ճանապարհներին տեղադրված խաչերը հեռացնելու հանձնարարական են տվել ՏԻՄ-երին: Այս մարզում էլ ճանապարհներին կանգնեցրած խաչերի պակաս չկա:

Նմանատիպ մի խաչ էլ տեղադրված է Հայանիստ և Հովտաշատ համայնքների միջնամասում: Հովտաշատի վարչական ղեկավար Նարեկ Տիգրանյանն ասաց, որ տեղյակ չէ ապամոնտաժման գործընթացից, նման հանձնարարական լինելու դեպքում հաստատ իրենց տեղեկացրած կլինեին: Համայնքի ղեկավարը շեշտեց՝ կողմ է, որ ճանապարհներին նման խաչեր կան, իր ձեռքը չի գնա դրանք քանդել: Ավելին, ըստ Հովտաշատի ղեկավարի, գիշերային ժամերին վառ լուսավորված խաչերը վարորդներին ոգևորում են։

«Ես շատ եմ տեսել, որ վարորդները, երբ մոտենում են խաչին, խաչակնքվում են, որ անփորձ տեղ հասնեն»,- պատմեց նա: Factor.am-ը զրուցեց նաև Գեղարքունիքի մարզի մի քանի համայնքների և Սիսիանի վարչական ղեկավարների հետ, որոնք ևս նշեցին՝ իրենց ճանապարհամերձ խաչերի ապամոնտաժման հետ կապված որևէ հանձնարարական չի տրվել:

Հիշեցնենք, որ առաջին անգամ միջպետական և համայնքային ճանապարհներին տեղադրված խաչերը, խաչքարերն ու հուշակոթողներն ապամոնտաժելու անհրաժեշտության մասին խոսել էր Նիկոլ Փաշինյանը: Նա 2022 թվականին հայտարարել էր, թե պետք է ճանապարհներին անօրինական տեղադրված խաչքարերն ու խաչերը հեռացվեն:

«Հայաստանում տարերային, նույնիսկ խուճապային տեմպերով ինչ-որ խաչեր են անընդհատ հայտնվում. ուր գնում ես խաչեր են, մի տեղ՝ պլաստմասից է, մեկ այլ տեղ՝ երկաթից, հին կահույքի մնացորդներից: Շատ դեպքերում դա ոչ մի կապ չունի քրիստոնեության, հավատի և քաղաքաշինության հետ, այլև վարկաբեկում է և ՛ քրիստոնեությունը, և ՛ հավատը, և ՛ քաղաքաշինությունը»,- կառավարության նիստում ասել էր վարչապետը: