Հայաստանում ԱՄՆ դեսպանատունը մեղմացրել է ՀՀ տարածքում անվտանգության նախազգուշացումը

Հայաստանում ԱՄՆ դեսպանատունն այսօր նախազգուշացում է տարածել՝ կոչ անելով դեսպանատան աշխատակիցներին և նրանց ընտանիքներին չայցելել ՀՀ մի շարք շրջաններ։
«ԱՄՆ դեսպանատան աշխատակիցներին և նրանց ընտանիքներին արգելվում է ոչ էական ճանապարհորդություն դեպի հետևյալ վայրեր, որը սահմանափակումների մեղմացում է վերջին ծանուցման հրապարակումից հետո։

Այդ վայրերն են․

Գեղարքունիքի մարզ՝ Վարդենիսից արևելք,

Սյունիքի մարզ՝ Գորիսից արևելք,

Սյունիքի մարզ՝ Կապանից հարավ,

Արարատի մարզի Երասխ գյուղով երթևեկությունը թույլատրվում է, կանգառը՝ ոչ»,-ասված է հայտարարության մեջ։

Հաղորդագրությունում ասվում է, որ ԱՄՆ քաղաքացիները պետք է շարունակեն զգուշավորություն դրսևորել Հայաստանի ու Ադրբեջանի միջև սահմաններին։ Նշվում է, որ հնարավոր է «ճանապարհների որոշ հատվածներում հատել սահմանը՝ առանց նկատելու»։

Մինչ այս Հայաստանում ԱՄՆ դեսպանատունը վերջին զգուշացումը տարածել էր սեպտեմբերի 19-ին, որի պատճառը ադրբեջանական ռազմական ագրեսիան էր։ Դրանում մասնավորապես ասվում էր․

«Տեղական լրատվամիջոցներն ու պաշտոնյաները հաղորդում են Լեռնային Ղարաբաղում (ԼՂ) մարտերի մասին: Հայաստանի և Ադրբեջանի սահմանի երկայնքով ռազմական գործողություններ չեն գրանցվել։ Դեսպանությունը գիտակցում է, որ սա արագ զարգացող իրավիճակ է և շարունակում է ուշադիր հետևել դրան: Հայաստանում ԱՄՆ դեսպանությունը խորհուրդ է տվել ԱՄՆ քաղաքացիներին, դեսպանատան աշխատակիցներին և նրանց ընտանիքներին շարունակել հետևել գործող սահմանափակումներին, որոնք բաղկացած են հետևյալ վայրեր ոչ էական ճանապարհորդություններից խուսափելուց.
-Տավուշի մարզ Վարագավանից արևելք՝ H37 ավտոճանապարհին.
-Տավուշի մարզ Նավուրից արևելք՝ H36 ավտոճանապարհին.
-Գեղարքունիքի մարզ Վարդենիսից արևելք.
-Արարատի մարզի Երասխ գյուղով երթևեկությունը թույլատրվում է, կանգառը՝ ոչ.
-Դեպի Ջերմուկ ճանապարհորդեք Վայոց ձորի մարզի Գետիկի կողքով՝ H42 և H43 ճանապարհներով:
-Սյունիքի մարզ, Լեռնային Ղարաբաղ մեկնելը շարունակում է արգելվել»: