04.06.2026 | 21:30
Եզրափակիչ բանավեճ՝ քաղաքական ուժերի առաջին համարների միջև. ՈՒՂԻՂ
Անի Իսպիրյանի նկատմամբ տնային կալանք կիրառելու միջնորդություն է ներկայացվել
Հասարակություն
02.02.2024 | 10:52
Օրերս աշխատանքից ազատված Էկոնոմիկայի փոխնախարար Անի Իսպիրյանի նկատմամբ տնային կալանք կիրառելու միջնորդություն է ներկայացվել։ Այս մասին հայտնում են իրավապահ համակարգում Factor.am-ի աղբյուրները։ Նշենք, որ Հանրային հեռուստաընկերությանը տված հարցազրույցում Էկոնոմիկայի նախարար Վահան Քերոբյանը հայտնել է, որ Անի Իսպիրյանը տանն է, ինչպես նաև կարծիք հայտնել, թե նա «անբասիր անձնավորություն» է։
Քննչական մարմինն ու Դատախազությունը Իսպիրյանի խափանման միջոցի, ներկայում նրա գտնվելու վայրի մասին տեղեկություններ չեն հայտնում, բայց Վահան Քորոբյանի խոսքից կարելի է եզրակացնել, որ նա ազատ է արձակվել ձերբակալումից, սակայն վարույթն իրականացնող մարմինը ներկայացրել է նրա նկատմամբ տնային կալանք կիրառելու միջնորդություն։
Հիշեցնենք, որ Էկոնոմիկայի նախարարությունում ենթադրյալ չարաշահումների դեպքի առթիվ նախաձեռնված քրեական վարույթների շրջանակներում ձերբակալվել են փոխնախարարի պաշտոնից ազատված Իսպիրյանը և այլ անձինք, որոնց թվում՝ Ազգային ժողովի նախագահ Ալեն Սիմոնյանի եղբոր կինը՝ Անի Գևորգյանը։ Վերջինիս նկատմամբ խափանման միջոց է ընտրվել կալանավորումը՝ 2 ամիս ժամկետով։ Երեկ կալանավորվել էր նաև «Սիներջի» ընկերության հիմնադիր Աշոտ Հովհաննիսյանը։
