Ժնևում Հայաստանի և Ադրբեջանի միջև միջխորհրդարանական երկխոսության հարթակի ստեղծման քննարկումներ կարող են լինել

Մարտին Ժնևում կարող են տեղի ունենալ Ադրբեջանի և Հայաստանի միջև միջխորհրդարանական երկխոսության հարթակ ստեղծելու շուրջ քննարկումներ։ Այս մասին ադրբեջանական  Trend-ի հետ հարցազրույցում ասել է Միջխորհրդարանական միության գլխավոր քարտուղար Մարտին Չունգոնգը։

Նա նշել է, որ կազմակերպությունը տեղյակ է տարածաշրջանի վերջին զարգացումներին, Ադրբեջանի և հարևանների հարաբերություններին, ու որպես ամբողջ աշխարհում խաղաղության և անվտանգության ամրապնդման համար ստեղծված կազմակերպություն, անհրաժեշտ է համարում կողմերի հետ քննարկումներ անցկացնել։

«Ես քննարկումներ եմ անցկացրել Ադրբեջանի իշխանությունների հետ և գոհ եմ իմ ստացած պատասխանից։ Այս փուլում մենք ձգտում ենք հասնել սկզբունքային համաձայնության, որ IPU-ն հարթակ կապահովի երկու երկրների համար խորհրդարանական մակարդակով հավաքվելու և անկեղծ ու ազնիվ ձևով քննարկելու այն հարցերը, որոնց լուծելը կարող է օգնել տարածաշրջանում խաղաղության ամրապնդմանը: Նախատեսում ենք քննարկումների հրավիրել երկու երկրների խորհրդարանների բարձրագույն ղեկավարությանը,- ասել է Մարտին Չունգոնգը։

Նա հայտնել է, որ Ադրբեջանի խորհրդարանի նախագահ Սահիբա Գաֆարովային հրավիրելու է Ժնև՝ բանակցություններ վարելու Հայաստանի գործընկերների հետ մշտական ​​երկխոսության այս հարթակի ստեղծման օրակարգում առաջ շարժվելու համար։ Մարտին Չունգոնգը հույս է հայտնել, որ հանդիպումը կկայանա Միջխորհրդարանական միության հաջորդ վեհաժողովի ժամանակ, որը տեղի է ունենալու այս տարվա մարտի 23-ից 27-ը։

«Մենք կցանկանայինք հրավիրել խորհրդարանականներին սկզբնական շրջանում ոչ պաշտոնական ձևաչափով հանդիպում անցկացնելու՝ իսկապես խոսելու այն հրատապ խնդիրների մասին, որոնք կռվախնձոր են երկու երկրների միջև: Եվ այս կերպ մենք կկարողանանք հասնել ավելի լավ փոխըմբռնման երկու երկրների խորհրդարանների միջև։ Այնուհետև, մենք կարող ենք փորձել ստեղծել բարենպաստ միջավայր երկու երկրների միջև ընթացող խաղաղ բանակցությունների հաջող արդյունքի համար»,-ասել է Միջխորհրդարանական միության գլխավոր քարտուղար Մարտին Չունգոնգը։