12.01.2025 | 00:54
Կիևյան փողոցի տներից մեկում հրդեհ է բռնկվել. դեպքի վայր է մեկնել չորս մարտական հաշվարկ
Հանրային հեռուստաընկերությունը պնդում է․ 2016-ից օրհներգի նույն տեսաշարն է հեռարձակվել՝ առաց Արարատ լեռան
01.02.2024 | 17:31
ՀԱԿ փոխնախագահ Արամ Մանուկյանը երեկ Azatutyun TV-ում հայտարարել էր, որ Հանրային հեռուստաընկերության եթերում ամեն օր հեռարձակվող օրհներգի կադրերում Արարատ լեռան կադրերն այլևս չկան:
«Ալիևի, Էրդողանի առաջարկներն արդեն իրագործում է նաև Հանրային հեռուստաընկերությունը, օրհներգի կադրերում այլևս Արարատը չկա»,- ասել էր Մանուկյանը։
Հանրային հեռուստաընկերության հանրային կապերի բաժնից Factor.am-ի գրավոր հարցմանն ի պատասխան հայտնել են, որ «2016 թվականից ի վեր Հանրային հեռուստաընկերության եթերում հեռարձակվում է ՀՀ պետական օրհներգի նույն տեսաշարը»: Խնդրել էինք նաև տրամադրել օրհներգի՝ 2023 թվականի տեսաշարը, բայց Հ/Ը-ն այս խնդրանքն անպատասխան է թողել։
Հիշեցնենք, որ օրեր առաջ ԱԺ նախագահ Ալեն Սիմոնյանը գրառում էր արել՝ կարծիք հայտնելով, որ ՀՀ օրհներգն ու զինանշանը պիտի փոխվեն։
«Ինձ համար ակնհայտ է, որ Հայաստանի Հանրապետության օրհներգը վաղ թե ուշ պետք է փոխվի, այն պետք է լինի հայկական, կապ ունենա մեր պետության ու հայկական երաժշտության հետ և լինի օրհներգի կանոններին համապատասխան: Չեմ պնդում, որ այն պետք է փոխարինել մեծն Արամ Խաչատրյանի երաժշտությամբ, որը, ըստ իս, շքեղ է, անգերազանցելի և մաքսիմալ հայկական, բայց ակնհայտ է, որ առկա օտարածին օրհներգի փոփոխությունն անհրաժեշտություն է: Իմ կարծիքով մենք նաև պետք է քննարկենք զինանշանի փոփոխության հարցը. առնվազն չի կարող Հայաստանը լինել ջրի տակ, ինչը պատիժ էր մարդկության համար, չի կարող առյուծը լինել ֆեյսբուքյան սմայլիկի նման, չի կարող Հայաստանը պաշտպանող սուրը լինել շղթայված»,- գրել էր Սիմոնյանը։
Նախորդ տարի էլ վարչապետն էր հայտարարել, որ զինանշանը կապ չունի 1991 թվականին հիմնադրված պետության հետ, իսկ օրհներգում առաջարկել էր փոխել վերջին քառատողը։
Արփի Հակոբյան
