Ալեն Սիմոնյանի եղբոր կինը ձերբակալվել է. հայտնի է՝ որ գործով է նա անցնում

Factor.am-ի տեղեկություններով երեկ ձերբակալվել է ԱԺ նախագահ Ալեն Սիմոնյանի եղբոր՝ Կարլեն Սիմոնյանի կինը՝ Անի Գևորգյանը: Քննչական կոմիտեի մամուլի քարտուղար Գոռ Աբրահամյանը ո՛չ հերքեց, ո՛չ հաստատեց տեղեկությունը՝ նշելով, որ նախաքննության շահերից ելնելով այս պահին տեղեկություններ տրամադրել չի կարող։

Մեր տեղեկություններով՝ Գևորգյանն անցնում է Էկոնոմիկայի փոխնախարարի պաշտոնից երեկ ազատված Անի Իսպիրյանի գործով և ձերբակալված 7 անձանցից մեկն է։ Այս պահին նախաքննական մարմնի կողմից կալանավորելու մասին միջնորդություններ են պատրաստվում։

Հիշեցնենք՝ Քննչական կոմիտեն երեկ հայտնել էր, որ նախաքննությամբ պարզվել է՝ ՀՀ էկոնոմիկայի նախարարության պաշտոնատար անձինք «Հանրային ներդրումային ծրագրերի բանկի ստեղծման» ծառայության ձեռքբերման մրցույթի ընթացքում մրցույթի մասնակից N բաժնետիրական ընկերության տնօրենի և աշխատակիցների դրդմամբ և օժանդակությամբ, մրցույթին այդ ընկերության հաղթանակն ապահովելու համար, խախտելով «Գնումների մասին» ՀՀ օրենքի և ՀՀ կառավարության 2017 թվականի մայիսի 4-ի թիվ N 526-Ն որոշման պահանջները, մրցույթի մյուս մասնակից հիմնադրամի համար ստեղծել են մրցույթին վերջինիս մասնակցությունն իբր անհնար դարձնող պայմաններ, նրան ապօրինաբար դիտել որպես մրցույթի պայմաններին չհամապատասխանող ու փաստացի հեռացրել մրցույթից: Դրա արդյունքում մրցույթում հաղթող է ճանաչվել մրցակցից շուրջ երեք անգամ ավել՝ ավելի քան 392 մլն ՀՀ դրամ գնային առաջարկ ներկայացրած ընկերությունը:

Ըստ ամենյանի՝ Անի Գևորգյանը մրցույթին մասնակցած ընկերություններից մեկի տնօրենն է։ Factor TV-ն կապ հաստատեց Գևորգյանի պաշտպան Մուշեղ Ալեքսանյանի հետ, սակայն նա խնդրեց ավելի ուշ զանգահարել։

Ռոզա Վարդանյան