Քաղաքականություն
01.02.2024 | 09:49
Նիկոլ Փաշինյանի ղեկավարած կառավարությունը մաքսային արտոնություն կտա Սամվել Ալեքսանյանի դստեր ընկերություններին։
Factor.am-ը կառավարության հրապարակած փաստաթղթերի ուսումնասիրությունից տեղակացավ, որ «Անիթեքս» ընկերությունը կազատվի 628 մլն դրամ մաքսատուրքից։
Անկողնային պարագաների արտադրությամբ զբաղվող այս ընկերությունը 7․1 մլրդ դրամի հումք է ձեռք բերելու ոչ ԵՏՄ անդամ պետություններից։ Ընկերությունում այս պահին առկա է 120 աշխատատեղ՝ 163 հազար դրամ միջին աշխատավարձով։ Ներդրումային ծրագրի շրջանակներում մինչև 2028 թվականը նախատեսվում է աշխատատեղերի թիվը հասցնել մինչև 170-ի՝ 200 հազար դրամ միջին աշխատավարձով։
Factor.am-ն իրավաբանական անձանց պետական ռեգիստրից տեղեկացավ, որ ընկերությունը հիմնադրվել է 2017 թվականին, գտնվում է Արարատի մարզում։ Նույն աղբյուրի համաձայն՝ «Անիթեքս»-ի միակ սեփականատերը «Նաթքոմ Լիմիթեդ» ընկերությունն է, որը գրանցված է Կիպրոսում։
232 մլն դրամի մաքսային արտոնություն էլ կտրվի նույն ոլորտում բիզնես գործունեություն ծավալող «ԷՅ ԲԻ ՍԻ ՏԵՔՍՏԻԼ» ընկերությանը, որը պատրաստվում է 4․58 մլրդ դրամի հումք ներմուծել՝ սրբիչների արտադրության համար։ Այս ընկերությունը ևս գտնվում է Արարատի մարզում, հիմնադրվել է 2017 թվականին։
Factor.am-ն իրավաբանական անձանց պետական ռիգիստրից տեղեկացավ, որ «ԷՅ ԲԻ ՍԻ ՏԵՔՍՏԻԼ» ընկերության միակ սեփականատերը ևս «Նաթքոմ Լիմիթեդ» ընկերությունն է։
«Հետքն»-ն ավելի վաղ հղում անելով Կիպրոսի ռեգիստրին գրել էր, որ այս ընկերության 40% բաժնեմասը պատկանում է Աստղիկ Ալեքսանյանին։ Երկու ընկերություններին տրվող ընդհանուր արտոնությունը կազմում է 860 մլն դրամ։
Նարեկ Կիրակոսյան
