Հասարակություն
31.01.2024 | 20:34Երևանի Մաշտոցի պողոտայի և Թումանյան փողոցի խաչմերուկին հարակից մայթի մի հատվածն արդեն մի քանի օր է՝ կանաչ ցանցով է առանձնացված։ Պատճառը հին սալահատակը նորով փոխելու աշխատանքներն են, որոնք դեռ չսկսված, կանգ են առել տեղացած առատ ձյան և ջերմաստիճանի կտրուկ նվազման հետևանքով։ Քաղաքացիները ստիպված են քայլել մեքենանների համար նախատեսված երթևեկելի առաջին գոտու մի հատվածով։ Չնայած այն սահմանազատված է երթևեկելի մասից՝ քաղաքացիները երբեմն դժվարությունների են բախվում։
Մեր նկարահանման ժամանակ տարածքում աշխատակիցներ կային, նրանք, սակայն, մեր հարցերին չցանկացան պատասխանել։ Քաղաքապետարանից Factor TV-ին փոխանցեցին, որ աշխատանքներն իրականացվում են Կենտրոն վարչական շրջանի մայթերի բարեկարգման ծրագրով։ Ըստ քաղաքապետարանի՝ 2023-ի վերջին «Առնա» ՍՊԸ-ն և «Աբաջանյան Շին» ՍՊԸ-ն շահել են կենտրոնի մի շարք տարածքներում մայթերի բարեկարգում իրականացնելու մրցույթը։ «Առնա» ՍՊԸ-ի տնօրենը՝ Ալբերտ Սեդրակյանը Factor TV-ին փոխանցեց, որ տարածքի քանդման աշխատանքները սկսել են մոտ երկու շաբաթ առաջ։
Ընկերության տնօրենի խոսքով՝ աշխատանքներն սկսելուց հինգ օր հետո առատ ձյունը և ջերմաստիճանի կտրուկ նվազումն են խանգարել դրանց ընթացքին։ Քաղաքապետարանից փոխանցում են, որ Կենտրոն վարչական շրջանում մայթերի բարեկարգման աշխատանքների իրականացման պայմանագրի ժամկետը 180 օր է։ Այստեղ բաց է մնում հարցը՝ իսկ ինչո՞ւ է քաղաքապետարանը որոշել հենց այս սեզոնին մայթերի բարեկարգում սկսել, եթե եղանակը կարող էր խանգարել դրանց։
Մանրամասները՝ տեսանյութում։
Անի Թամրազյան
