ԱԱԾ-ն հրաժարվել է կատարել Ծառուկյանի մայր գործի նյութերը դատարանին տրամադրելու պահանջը

Ազգային անվտանգության ծառայությունը հրաժարվել է կատարել դատարանի պահանջը` ԲՀԿ առաջնորդ Գագիկ Ծառուկյանի և «Մուլտի գրուպ կոնցեռն» ընկերության սեփականատեր, տնօրեն Սեդրակ Առուստամյանի մայր գործի նյութերը դատարանին տրամադրելու վերաբերյալ: Այս մասին պարզ դարձավ Ծառուկյանի և Առուստամյանի վերաբերյալ գործով դատական նիստի ընթացքում:

Դատավոր Արամ Գրիգորյանը հայտնեց, որ ԱԱԾ-ն, ի պատասխան գործի նյութերը տրամադրելու վերաբերյալ դատարանի պահանջի, հայտնել է, որ նյութերը հնարավոր չէ տրամադրել:

Ծառուկյանի պաշտպանները հայտարարեցին, որ ԱԱԾ-ն հրաժարվել է կատարել դատարանի որոշումը: Դատախազն էլ դիտարկեց, որ դատարանում քննվող քրեական գործի ընթացքում նախաքննության ընթացի մեջ գտնվող գործի նյութեր տրամադրելու ընթացակարգ գոյություն չունի: Պաշտպանական կողմը պահանջեց իրենց տրամադրել ԱԱԾ-ի` նյութերի տրամադրումը մերժելու մասին գրությունը` դրան ծանոթանալու և դիրքորոշում հայտնելու համար, սակայն դատավոր Գրիգորյանն ասաց, որ ԱԱԾ-ի նյութերը կտրամադրվեն նիստի ավարտին ու շարունակեց գործում առկա գրավոր ապացույցների հետազոտումը:

Հիշեցնենք, որ Ազգային ժողովի ընտրությունների ժամանակ ընտրողներին կաշառք տալու վերաբերյալ Ծառուկյանի և Առուստամյանի գործն անջատվել է ԱԱԾ-ում քննվող մեկ այլ գործից և ուղարկվել դատարան:

Ըստ Դատախազության` Առուստամյանին ու Ծառուկյանին վերաբերելի նյութերն ամբողջությամբ ներառված են այժմ դատարանում քննվող գործում, սակայն Ծառուկյանի պաշտպանները միջնորդել են մայր գործի բոլոր նյութերը տրամադրել իրենց:

Ըստ պաշտպանների` իրենք, մայր գործի բոլոր նյութերին ծանոթանալով, կարող են չկիսել դատախազի գնահատականն այն մասին, որ վերաբերելի բոլոր նյութերը ներառված են գործում:

«Մենք հակադիր կողմերում ենք, և մեր դիրքորոշումները չեն համընկնում, հետևաբար՝ մրցակցական դատավարություն ապահովելու համար մեզ անհրաժեշտ են գործի բոլոր նյութերը»,- միջնորդությունը ներկայացնելիս նշել է պաշտպաններից Էմին Խաչատրյանը` հավելելով, որ որևէ մեկն իրենց` Ծառուկյանի պաշտպանների փոխարեն դատողություն անելու իրավասություն չունի:

Պաշտպան Երեմ Սարգսյանն էլ հրապարակել էր վերաքննիչ քրեական դատարանի դատավոր Վազգեն Ռշտունու որոշումներից մեկն այս խնդրի առնչությամբ։ Դատարանն այս որոշմամբ արձանագրել էր, որ թեև չպետք է առաջնորդվել վարույթն իրականացնող մարմնի անբարեխղճության կանխավարկածով, բայց գործի նյութերի ամբողջականության գնահատումը չի կարող միայն վարույթն իրականացնող մարմնի հայեցողությամբ և ընկալմամբ իրականացվել, այս հարցում կարևոր է կողմերի գնահատման խնդիրը։

Ծառուկյանի գործով դատավորը որոշել էր բավարարել միջնորդությունն ու ԱԱԾ քննչական դեպարտամենտից պահանջել քրեական գործի բոլոր նյութերը քրեական գործից մաս անջատելու օրվա դրությամբ:

Արաքս Մամուլյան