22.01.2026 | 15:49
Ռուբեն Ռուբինյանն ընդունել է ՀՀ-ում Հունաստանի դեսպանին
Ռոբերտ Քոչարյանի պաշտպանները մամուլից են տեղեկացել, որ Դատախազությունը մերժել է պատգամավորների անձնական երաշխավորության միջնորդությունը
Հասարակություն
08.08.2018 | 12:07
«Դատախազության որոշումն ընդունում եմ ի գիտություն, որպես դատավարական գործընթաց և գնահատական չեմ տալիս»,- անդրադառնալով ՀՀ գլխավոր դատախազության կողմից Հայաստանի երկրորդ նախագահ Ռոբերտ Քոչարյանի համար անձնական երաշխավորություն ներկայացրած պատգամավորների միջնորդության մերժմանը, Factor.am-ին ասաց փաստաբան Ռուբեն Սահակյանը։
Երկրորդ նախագահի պաշտպանը չցանկացավ ասել, թե որոնք կլինեն իրենց հաջորդ քայլերը, բայց ասաց Դատախազության մերժման տեքստը չեն ստացել․ «Մենք տեքստ չենք ստացել, ընդամենը` մամուլի հրապարակում, իսկ թե ինչպես ենք մոտենում դրան ամեն մեկն իր կարծիքը կարող է ունենալ»,- ասաց Սահակյանը։
Նշենք, որ Factor.am-ի հետ զրույցում ՀՀ գլխավոր դատախազության հանրային կապերի բաժնի պետ Արևիկ Խաչատրյանն ասել էր, որ նախաքննության ներկա փուլում պահպանվում են Ռոբերտ Քոչարյանի նկատմամբ ընտրված խափանման միջոց կալանավորման հիմքերը․ «Անազատության հետ չկապված այլ խափանման միջոցի ընտրությունը դեռևս ի զօրու չէ երաշխավորել մեղադրյալի պատշաճ վարքագծով պայմանավորված քննության անխափան ընթացքը»,- նշել էր նա։
Լիլիթ Շաբոյան
