Հայաստանն ու Վրաստանը ռազմավարական գործընկերության հռչակագիր են ստորագրել․ՏԵՍԱՆՅՈՒԹ

Հայաստանի և Վրաստանի վարչապետներ Նիկոլ Փաշինյանի և Իրակլի Ղարիբաշվիլիի գլխավորությամբ Թբիլիսիում տեղի ունեցած Հայաստանի և Վրաստանի միջև տնտեսական համագործակցության միջկառավարական հանձնաժողովի նիստի շրջանակում ստորագրվել են երկկողմ փաստաթղթեր:

Նիկոլ Փաշինյանը և Իրակլի Ղարիբաշվիլին ստորագրել են «Հայաստանի Հանրապետության և Վրաստանի միջև տնտեսական համագործակցության միջկառավարական հանձնաժողովի 13-րդ նիստի» արձանագրությունը և «Հայաստանի Հանրապետության և Վրաստանի միջև ռազմավարական գործընկերության հաստատման մասին» հռչակագիրը:

Հայաստանի Հանրապետության արտաքին գործերի նախարար Արարատ Միրզոյանը և Վրաստանի արտաքին գործերի նախարար Իլյա Դարչիաշվիլին ստորագրել են «Հայաստանի Հանրապետության կառավարության և Վրաստանի կառավարության միջև դիվանագիտական ներկայացուցչությունների և հյուպատոսական հիմնարկների անձնակազմի ընտանիքի անդամների կողմից վարձատրվող գործունեություն իրականացնելու մասին» համաձայնագիր:

Հայաստանի Հանրապետության էկոնոմիկայի նախարարի տեղակալ Արման Խոջոյանը և Վրաստանի շրջակա միջավայրի պաշտպանության և գյուղատնտեսության նախարարի տեղակալ Թենգիզ Նասարիձեն ստորագրել են «Հայաստանի Հանրապետության էկոնոմիկայի նախարարության և Վրաստանի շրջակա միջավայրի պահպանության և գյուղատնտեսության նախարարության միջև գյուղատնտեսության ոլորտում համագործակցության մասին» փոխըմբռնման հուշագիր:

Վրաստանում Հայաստանի Հանրապետության արտակարգ և լիազոր դեսպան Աշոտ Սմբատյանը և Վրաստանի բռնազավթված տարածքներից ներքին տեղահանված անձանց, աշխատանքի, առողջապահության և սոցիալական հարցերի նախարարի տեղակալ Տամիլա Բարկալաիան ստորագրել են «Հայաստանի Հանրապետության աշխատանքի և սոցիալական հարցերի նախարարության և Վրաստանի բռնազավթված տարածքներից ներքին տեղահանված անձանց, աշխատանքի, առողջապահության և սոցիալական հարցերի նախարարության միջև աշխատանքի և սոցիալական պաշտպանության ոլորտում համագործակցության մասին» փոխըմբռնման հուշագիր:

Ղարիբաշվիլին ասել է, որ Վրաստանն ու Հայաստանը միշտ եղել են ռազմավարական բարեկամներ և գործընկերներ, և այդ իրողությունը պաշտոնապես ամրագրվել է այսօր։

«Հատկապես ուզում եմ կարևորել այսօրվա որոշումը, որի վրա աշխատել ենք վերջին ամիսներին։ Դեռ անցյալ տարվա ամռանը մենք հայտարարել էինք, որ ստորագրելու ենք ռազմավարական համագործակցության հուշագիր։ Ուզում եմ նաև նշել, որ ավանդաբար, պատմականորեն մենք շատ ուժեղ դաշնակիցներ ենք, ընկերներ, ոչ թե պարզապես հարևաններ։ Մենք ունենք շատ լավ գործընկերություն, հարաբերություններ, համագործակցություն բոլոր ուղղություններով և, դե ֆակտո, կարելի է ասել, որ մենք արդեն ռազմավարական ընկերներ և ռազմավարական գործընկերներ էինք։ Այսօր, կարելի է ասել, այս իրողությունը ֆորմալացվել է, և մենք պաշտոնապես ստորագրել ենք ռազմավարական գործընկերության մասին համագործակցության հռչակագիրը»,-հայտարարել է Վրաստանի վարչապետը։