12.01.2026 | 23:30
Գերմանիան և Հնդկաստանն ընդլայնում են ռազմական համագործակցությունը
Բռնության ենթարկված 265 կին և երեխա ապաստարաններում է․ 2023-ին բռնարարքները ՀՀ-ում կտրուկ աճել են․ ՏԵՍԱՆՅՈՒԹ
Հասարակություն
25.01.2024 | 19:55
Թեժ գծին ստացված գրեթե 4000 զանգ, 2000-ից ավելի սոցիալական խորհրդատվություն և այլ ծառայություններ․ այսօր Կանանց աջակցման կենտրոնն ամփոփեց 2023-ին կատարած աշխատանքի արդյունքները, ինչպես նաև խորհրդատվական կենտրոնի ու ապաստարանների բարելավմանն ուղղված ծրագիրը։
Անցած տարվա ընթացքում 265 կին և երեխա ապաստարանով է ապահովվել։ Իրավապաշտպան Զառա Հովհաննիսյանի խոսքով՝ ընտանեկան բռնության դեպքերը 2023-ին կտրուկ աճ են գրանցել 2022-ի համեմատ։
Հովհաննիսյանը հիշեցնում է անցած տարվա ընթացքում երեխաների նկատմամբ գրանցված բռնության աղմկահարույց դեպքերը։ Իրավապաշտպանի խոսքով՝ կարևոր է բռնության մասին իրազեկելը, քանի որ ոչ պատշաճ արձագանքման հետևանքով վնասները կրում են առաջին հերթին կանայք և երեխաները։
Աշխատանքի և սոցիալական հարցերի նախարարությունը շուրջ 4 տարի է՝ համագործակցում է Կանանց աջակցման կենտրոնի հետ։ Անցած տարվա ընթացքում նախարարությունը համաֆինանսավորել է կենտրոնի երկու ապաստարանների գործունեությունը։ Նախարարության Մարդկանց թրաֆիքինգի և կանանց հիմնահարցերի բաժնի պետ Սոֆի Բոստանչյանի խոսքով՝ Երևանում և մարզերում կանանց աջակցման կենտրոններից օգտվել է շուրջ 1860 անձ՝ 10-ը եղել են տղամարդիկ։
Կանանց աջակցման խորհրդատվական կենտրոնի և երկու ապաստարանների վերանորոգումը համաֆինանսավորել է Հայաստանում Ճապոնիայի դեսպանատունը։ Դեսպան Աոկի Յուտական նշում է՝ կարևոր է կանանց և երեխաներին ապահովել անհրաժեշտ միջավայրով։
Կանանց աջակցման կենտրոնը դեսպանին ներկայացրեց համատեղ աշխատանքի արդյունքները։ Աոկի Յուտոկան նշեց՝ դեսպանությունը բաց է նման ծրագրերի շուրջ համագործակցել Հայաստանի տարբեր կառույցների հետ։
Մանրամասները՝ տեսանյութում։
Անի Թամրազյան
