06.08.2026 | 17:50
Անկանոն երթևեկող «Նիվան» տեղափոխվել է հատուկ պահպանվող հատուկ տարածք
«ՄՏՍ Հայաստանի» բաժնետոմսերի 20%-ն անհատույց կփոխանցվի ՀՀ-ին
Տնտեսություն
25.01.2024 | 16:08
«ՄՏՍ Հայաստան» ՓԲԸ-ի 20 %-ը կանցնի ՀՀ Կառավարությանը։ Այս մասին ասվում է ընկերության հաղորդագրության մեջ։
Հիշեցնենք, որ հունվարի 24-ին հայտնի դարձավ, որ ընկերությունը դադարում է ռուսական «ՄՏՍ» խմբի մաս կազմել: Ընկերության նոր բաժնետերը կիպրական «Ֆեդիլքո Գրուպ Լիմիթիդ» (FEDILCO GROUP LIMITED) ընկերությունն է:
«Հայաստանի համար «ՄՏՍ Հայաստան» ՓԲԸ-ի ռազմավարական նշանակությունը հաշվի առնելով՝ «Ֆեդիլքո Գրուպ Լիմիթիդ»-ը մտադրված է բաժնետոմսերի 20%-ը փոխանցել Հայաստանի Հանրապետությանը` անհատույց»,- նշված է հաղորդագրության մեջ։
Հիշեցնենք, որ 2023 թ. ապրիլին ՀՀ մրցակցության պաշտպանության հանձնաժողովը մերժել էր «ՄՏՍ Հայաստան» ՓԲԸ-ի բաժնետոմսերի վաճառքը «Ֆեդիլքո Գրուպ Լիմիթիդ» ընկերությանը: Որպես պատճառ հանձնաժողովը նշում էր, որ գործարքը վնասում է կամ կարող է վնասել ՀՀ պետական շահերին ու ազգային անվտանգությանը։
Սակայն 2023-ի նոյեմբերի 15-ին ՀԾԿՀ-ն թույլատրեց, որ «ՄՏՍ Հայաստան»-ը վաճառվի կիպրական «Ֆեդիլքո Գրուպ Լիմիթիդ» ընկերությանը։ Հանձնաժողովի հրապարակման մեջ նշվում էր․ «նկատի ունենալով, որ «ՄՏՍ-Հայաստանը» և վերջինիս ներկայիս բաժնետիրական շղթայում ընդգրկված կազմակերպությունները պատկանում են ռուսական «Մոբիլնիե Տելեսիստեմի» հանրային բաժնետիրական ընկերությանը, նշված գործարքի կնքման արդյունքում «ՄՏՍ-Հայաստանը» այլևս չի հանդիսանալու «ՄՏՍ խմբի» մասնակից»
