14.09.2026 | 18:19
Փաշինյանն ու Բունդեսթագի պատվիրակությունը քննարկել են Հայաստան–Գերմանիա և Հայաստան–ԵՄ հարաբերությունները
Համազգեստի շուկայի հնաբնակները․ «Զինտեքստիլը» շուրջ 100 մլն դրամի պատվեր է ստացել
24.01.2024 | 16:32
ՀՀ վարչապետի աշխատակազմը 5 մլն 520 հազար դրամ կվճարի Ազգային ժողովի նախկին պատգամավոր (1999-2007 թթ․), Արտաշես Գեղամյանի «Ազգային միաբանություն» խմբակցության անդամ Գագիկ Կոստանդյանի հետ փոխկապակցված ընկերությանը։ Խոսքը «Զինտեքստիլ» ՍՊԸ-ի մասին է, որի սեփականատերն ու ղեկավարը Կոստանդյանի կինն է՝ Աննա Վանեցյանը։
«Զինտեքստիլը» համազգեստ է կարելու Բնապահպանության և ընդերքի տեսչական մարմնի աշխատակիցների համար։ 2024 թ-ի հունվարի 17-ին էլեկտրոնային աճուրդի արդյունքում կնքված պայմանագրի համաձայն՝ ընկերությունը կարելու է 12 հատ կարճաթև շապիկ, 8 հատ տաբատ, 6 հատ կիսաշրջազգեստ, 3 հատ սվիտեր, 2 կիսավերարկու, 3 հատ ամառային և 3 հատ ձմեռային գլխարկ, 3 հատ գոտի՝ իր 3 գրպանիկներով, որ նախատեսված են զենք, հատուկ միջոցներ և պարագաներ կրելու համար:
Ուշագրավ է, որ էլեկտրոնային աճուրդին մասնակցել է ևս 2 ընկերություն՝ «Դոնեռ» ՍՊԸ և «Գայանե Հակոբյան Գևորգի» Ա/Ձ։ Եվ թեև վերջինն առաջարկել է ավելի ցածր գին՝ 5․5 մլն դրամ, հաղթող ընտրվել է «Զինտեքստիլը»։
«Զինտեքստիլ» ընկերությունը հիմնադրվել է 2022 թ-ի դեկտեմբերին, բայց 2023 թ-ի ընթացքում ստացել է համազգեստների ընդհանուր 96․2 մլն դրամ արժեքով պատվերներ ՀՀ դատախազությունից, Երևանի ՋԷԿ-ից, Բարձրավոլտ էլեկտրացանցերից, Երևանի Մխիթար Հերացու անվան բժշկական համալսարանից։
Աննա Վանեցյանին պատկանող ընկերությունները՝ «Դերձակ», «Պահապան», «Պահապան 1», 2016 թվականից ի վեր տարիներ շարունակ պետական տարբեր մարմինների՝ Դատական դեպարտամենտի, Արտակարգ իրավիճակների նախարարություն, Պետական եկամուտների կոմիտ, Պետական պահպանության ծառայություն, Գյուղատնտեսության և Պաշտպանության նախարարություններ, Քննչական կոմիտե և այլն, մատակարարել են համազգեստ ու հանդերձանք, իրականացրել պահնորդական ծառայություն՝ բյուջեից ստանալով հսկայական գումարներ։
Ի դեպ, Աննա Վանեցյանի գործընկերը և «Պահապան» ընկերության հավասար համասեփականատերը ՀՀ վերաքննիչ քրեական դատարանի նախկին դատավոր Գրիշա Մելիք-Սարգսյանի դուստրն է՝ Վիկտորյա Մելիք-Սարգսյանը։
Նկատենք, որ թե՛ «Դերձակ»-ը, թե՛ «Պահապան»-ը և թե՛ «Պահապան 1»-ը պարբերաբար հայտնվել են Ֆինանսների նախարարության՝ պետական գնումների գործընթացին մասնակցելու իրավունք չունեցող մասնակիցների ցանկում՝ տարբեր կառույցների հետ գնման պայմանագրերը խախտելու պատճառով։
Գայանե Խաչատրյան
