Մանվել Գրիգորյանի դատավոր դուստրը ոչ միայն հորեղբորորդու, այլև ուրիշ ազգականների վերաբերյալ գործեր է քննել

Բարձրագույն դատական խորհրդում քննվող կարգապահական վարույթով «մեղադրյալ» դատավորն այսօր գեներալ Մանվել Գրիգորյանի դուստրն էր՝ Արմավիրի մարզի ընդհանուր իրավասության դատարանի դատավոր Նաիրա Գրիգորյանը։

Վերջինիս նկատմամբ կարգապահական վարույթ է հարուցվել՝ հարազատ հորեղբոր որդու գործով ինքնաբացարկ չհայտնելու համար։

Արադարադատության նախարարության ներկայացուցիչ Հայկ Սանոյանը դատավորին կարգապահական պատասխանատվության ենթարկելու միջնորդությունը ներկայացնելիս նշեց, որ դատավորի նկատմամբ կարգապահական վարույթ հարուցելու միջնորդությունը ներկայացրել է հենց դատավորի հորեղբոր որդին՝ Հրանտ Գրիգորյանը՝ հայտնելով, որ այնքան էլ լավ հարաբերությունների մեջ չէ դատավորի հետ։

Ըստ վարույթի նյութերի՝ դատավոր Նաիրա Գրիգորյանը նախկինում ևս Հրանտ Գրիգորյանի վերաբերյալ գործ է ստացել, սակայն պարզելով, որ խոսքն իր հորեղբոր որդու մասին է, ինքնաբացարկ է հայտնել։ Իսկ ահա այս գործով նույն վարքագիծը չի դրսևորել, վարույթ է ընդունել գործը, կողմերի մոտ չի բացահայտել ինքնաբացարկի հնարավոր հիմքերն ու դրանով դատական ակտ է կայացրել։

Նաիրա Գրիգորյանը ԲԴԽ-ին հայտնեց, Հրանտ Գրիգորյանի վերաբերյալ 2020 թվականի գործը, որով ինքը ինքնաբացարկ է հայտնել, ընդհանուր կարգով է քննվել, իսկ կարգապահական վարույթի հիմք հանդիսացած գործը պարզեցված կարգով է քննել, ինքը վարույթ ընդունելիս թեև տեսել է, որ կողմի անունը, ազգանունը և հայրանունը համապատասխանում է իր հորեղբոր որդու տվյալների հետ, բայց, իր իմանալով, նա պետք է Արշալույս գյուղում գրանցված լիներ, մինչդեռ գործում այլ հասցե է նշված եղել, իսկ վարույթին անձնագիր կցված չի եղել։

Այնուամենայիվ, ըստ դատավորի, գործը վարույթ ընդունելուց հետո կողմերին իրենց իրավունքների և պարտականությունների մասին ծանուցագիր ուղարկելիս նրանց հայտնել է ինքնաբացարկ հայտնելու իրավունքի մասին, սակայն իրեն ինքնաբացարկ չի ներկայացվել, ավելին, կողմը չի էլ վիճարկում իր վերաբերյալ կայացված դատական ակտը, միայն վիճարկում է այն հանգամանքը, որ ինքը՝ Նաիրա Գրիգորյանն է քննել այս գործը։

Դատավորը նաև նշեց, որ ինքը բացասական վերաբերմունք չունի հորեղբոր որդու նկատմամբ։

Դատավոր Արշակ Վարդանյանը փորձեց պարզել՝ դատավոր Գրիգորյանի կարծիքով՝ եթե նա ինքնաբացարկ հայտներ, մեկ այլ դատավոր այլ որոշում կկայացնե՞ր, թե՞ այն նույն որոշումը, որը Նաիրա Գրիգորյանն է կայացրել, ինչին ի պատասխան դատավորն ասաց, որ ցանկացած դատավոր նույն որոշումը կկայացներ՝ օրենքի հիման վրա։

Նախագահող դատավոր Կարեն Անդրեասյանը փորձեց հարցի միջոցով հստակեցնել՝ արդյո՞ք դատավորի վարույթում շուրջ 4000 գործի առկայությունը չի նպաստել, որ դատավորը չնկատի, որ վարույթ է ընդունում իր հորեղբոր որդու գործը։

«Եթե Ձեր վարությում 200 գործ լիներ, դուք կարդայիք անուն ազգանունը, կիմանայի՞ք, որ Ձեր հորեղբոր որդու գործն է»,- հարցրեց Կարեն Անդրեասյանը, սակայն Նաիրա Գրիգորյանը հստակ չպատասխանեց այդ հարցին՝ միայն շարունակելով պնդել,, որ եթե ի սկզբանե իմանար, որ հորեղբոր որդու գործի մասին է խոսքը, այն վարույթ չէր ընդունի։

Նիստի ընթացքում դատավորը նաև այլ հանգամանքներ բացահայտեց․ ասաց, որ նախկինում նաև հորեղբոր աղջկա և իր ևս մեկ ազգայանի վերաբերյալ գործ է քննել՝ կրկին պարզեցված վարույթով։

Գործի քննությունն այսօր ավարտվեց․ ԲԴԽ-ն հեռացավ խորհրդակցական սենյակ՝ որոշում կայացնելու, որը կհրապարակվի հունվարի 29-ին։

Արաքս Մամուլյան